最新進展

好耐冇更新自己個網誌, 就打一篇文章, 等各位都繼續知道我既存在 :p

• 老闆返左嚟啦. 好野, 又做少一份野. 不過聽到話老細想放多d時間睇住佢d細路, 想唔做而家個位. 又開始擔心邊個會嚟接呢個位.
• 坐係隔離位咸濕同事終於離去了, 少了一點歡樂. 遲d 一位識了十幾年既同事會坐係隔離, 算係一個安慰.
• 呀同事a 真係好鍾意上堂training. 差唔多每個月都話要有兩三日training. 我唔鍾意, 但佢就好鬼鍾意.
• 公司麻煩人繼續出現. 今日晏晝要同一隻"信鴿"開會. 乜野係信鴿? 咪就係收到人地既請求個陣, 就即刻將個請求轉交其他人. 自己就安然地坐係度等出糧既人. 我已經打算晏晝炳佢一鍋. 四個月之前做野個陣就唔出聲. 而家就話我地要點樣點樣做, 話係老細要. 痴佢條孖筋. 好明顯老細唔係呢兩三日先話要既. 幾個月前做野個陣佢又唔出聲.
• wii 我冷落了你. 就算出左wii fit 都未買. 冇乜時間玩. 都幾貴. 成$1070. 比起日元對換價貴左四舊水左右.
• ps2 排球game 我都冷落了你, 因最近比較忙. 冇乜時間玩.
• nds, 你仍然在我的檯頭, 未有時間同你傾幾句計. 對不起.
• 新裝飾櫃, 每日我放工返嚟見到你, 望下d戰利品就好鬼合皮. 玩具展, 我等緊你.
• 日文, 真係好對唔住你, 成日話想出年考, 但而家就將佢擺埋一邊.
• 游水, 好想但每次想起都唔想郁
• 行山, 終於行左今個秋季既第一次. 好舒服. 可惜臨尾落樓梯個陣, 個膝頭哥又有反應, 大叫唔好. 好彩隔左一陣就冇事. 我諗要增下肥, 整粗隻腳, 等佢唔駛話"你上身好重呀, 大哥, 點支撐得住呀" 呵呵呵!
• 打波, 又係好想但最衰冇場. 死人啟勝幾時整番好個場架. 將佢轉晒做地板咪幾好, 容易打理.
• 音樂 - 最近同你出雙入對. 大部份既時間都係你架啦. 今個月有幾個大"分純", 所以成日都要練習, 加上要上堂. 你雖然佔用了我好多時間, 但我都好樂意.
• facebook - 日日都要上去玩下war room 同搵隻核突彊屍同人隻抽先至安樂.
• 遠方的家人今個月會返嚟, 終於可以一家齊齊整整吔餐飯仔.
• 仍都搞緊和朋友的聖誕派對. 交換禮物係最開心不過的. 不過要諗買邊間餐廳既到會好呢 :p
• 身體仍然過得去. 慶幸冇感冒. 同埋冇呀老友達咁既殘樣 :p
• 打邊爐 - 我仍然想繼續同你有過約會. kakakakkakaak

夠鐘, 又係訓晏覺時間. gd nite everyone! zzzzzzzzzzzzzzzzzzzzzz

仍然生存

出一個短短POST, 證明自己仍然生存. 但真係好攰........ physical 同 mental. 而家公司乜鬼狗屎垃圾都會扔過來.

最近要學唱MESSIAH. 真係好難. 十二月中會係堅道總堂獻唱. 要努力加油!!!!!!! 不過到時都係咪嘴多 :P

有興趣大家可以聽聽.
http://savedsounds.com/Messiah/Messiah_parts_mp3/index.html

十一月, 繁忙月

十一月係一個好繁忙既月份, 點解? 因為

• 老細放產假未返, 隔離TEAM 既頭放婚假, 我要睇住佢個TEAM. 另一個TEAM HEAD放HOME LEAVE, 我要幫佢睇一半既JOB. 隔離位同事一個月後走, 我要接佢D 野. 另一個TEAM HEAD因為手頭多野做到死, 有個junior 會接, 但我要睇住呢位 junior staff. 加上自己個TEAM好多野. 仲唔死!!!!!!!
  
• 今個月堂區主保瞻禮, 每個禮拜要練歌, 遲D要每個禮拜練兩次. 仲有其他特別慶典要練歌.
  
• 月底開始要去堅道總堂上教會一個音樂短期音樂課程

希望今個月底, 我仲可以上嚟寫十二月要做D乜 :P

對唔住, Wii

幾個月之前發覺ps2 會出個排球game. 我興奮到不得了. 我講緊既唔係沙灘排球. 係正式既六人室內排球game. 好耐冇出新既game啦. 去網頁睇下, 嘩......好靚呀. 個陣已經決定要買. 係咁等等等.

十月廿五日個去開深水埗, 有冇搞錯呀, 冇架. 不過網上d人都有講, 而家好少鋪頭賣ps2 game. 再加上排球算係"冷門"tv game, 所以好多人都搵唔到. 連灣仔個邊都冇. 隻game都算幾貴, 要7500日圓. 我聽講有人買到, 都要成港銀四舊幾水 (不過話好快冇晒貨) 冇辦法, 要學大款咁豪, 係網上邊訂, 要5舊水. 太鍾意啦. 貴就貴啦.

都好快, 第二日晏晝三點幾係公司收到. 啱啱個陣冇乜心情做野, 走去廁所偷懶睇下呢個game 既說明書 (kakakaakak :p). 好好玩呀. 個日拿拿臨做晒手頭上要清既野. 即刻返屋企玩下呢隻game先. 真係好正, 有晒我一直想要既野 - 尤其係打戰術個part, 簡直係一流, 仲有就係全部球員係用真名. 好有投入感. 好彩識日文, 因為真係要睇說明書點樣控制每一個動作同戰術既安排. 玩到停唔到手.

Wii, 而家唯有將你放埋一邊先. 等我繼續玩呢個我等左好耐既排球game. yeah!!!!!!!!!

日本遊(十)

唔經唔覺又到左嚟日本既最後一日啦. 本來諗住訓晏D, 點知倒屎咁早又醒左. 我始終係一個農夫, 晨早要起身耕田. 咁早起身就落去食下早餐啦. 嘩, 禮拜朝都咁鬼多人食早餐架. 話晒最後一日係酒店食早餐, 梗係摶命咁食啦, 有乜食乜, 有乜飲乜. UM.....食左好多碟之後..夠皮. 大約八點幾上番房執埋最後D行李. 開電視視下先....E...卡通片時間喎. 正..啱我. 睇左幪面超人, 一套好似美少女戰士既卡通, 遊戲王同埋 海賊王. 睇到差唔多十點就同房SAY sayonara 啦. 推住個喼去check out. 住左六日五晚, 盛惠十萬日圓, 好彩可似返公司claim 數嗟.

check out 完放低行李係counter 到, 又出去行下. 時間仲好早, 所似條街好靜. 得三個鐘頭時間冇乜野好行, 咁就去左d 書店睇書. 左又睇下, 右又睇下. 係書房都留左差唔多個幾鐘. d 書味好香 :p

跟住就搵隻吔. 最後一日唔知食乜好. 睇左幾間唔啱心水, 又差唔多午飯時間, 越o黎越多人. 最後係火車站裏面一間中華麵鋪食左個set lunch, 有麵啦, 飯同餃子, 都幾好味. 用左差唔多890日圓. 用電話影左呢幅相. 食完返酒店拎行李, 坐巴士去機場. 架巴士經過彩虹橋同台場, 還左我最後心願 :p

我六點半機, 三點半去到啦. 週圍行啦. 有冇搞錯呀, 禁區裏面冇乜野食既. 算, 忍口唔食. 後嚟見到yahoo cafe, 入去check email呀, facebook呀, 上科林呀. 都搞左個幾鐘. 差唔多時間就上機loo. 仲見到兩個朋友.

我真係好唔好彩, 上機個陣張飛彈左出嚟, 個空姐話我聽我坐個個位冇電視睇, 因為壞左. 咁我問佢有冇其他位, 佢話爆晒. 上到去發覺
1) 唔只電視壞, 係櫈上面既燈制都壞埋
2) 係我附近幾個位都壞埋.

咁諗住冇人坐附近就可似鬆下啦. 點知一位7+1 既女人係隔離摽出嚟坐係我前面. 佢老公肥過隻支, 所似咁佢坐個嚟. 但成程有三分一時間佢地兩隻手係隔住走廊拖住. 大佬呀, 唔好阻街得唔得. 呢位7+1 女人真係自私到explode factory. 人地未食完野就係咁垂低佢個位. 如果我有杯野係度, 倒瀉, 佢同佢老公拖位手係度抺呀. 我有幾下突登用膝個頭哥頂佢幾下. 吹咩, 個位窄呀, 係咁架啦.　最後係架機到睇左一套半戲, die hard 4 (都幾好睇) 同半套呀sa + 詹瑞文做個套戲呢 (都幾好笑). 又偷睇左隔離位個套魔盜王第三集 (原來我係戲院到睇個陣miss 左最尾個度喎).

返到香港都夜晚十點幾. 之前call 左的士. 而家要去到三號停車場先上到車, 都好鬼遠下. 冇計. 慢慢行.

咁就玩完八日日本旅程. 而呢篇日記都寫完啦. 多謝各位捧場!!!!

日本遊(九)

今日係嚟日本既第七日, 晨早(大約八點)約埋同事一齊向築地出發. 係都廳前站坐都營大江戶線去築地市場站. 因為今日係禮拜六, 所似地鐵都冇乜人. 出左站後, 涼風一陣陣, 係我好鍾意既秋天涼風, 爽呀!!!!!! 去邊到食好呢. 聽大款講, 去壽司大先. 去到係隔離咁既樣, 你話等唔等啦. 隔離乜鬼大和壽司又係多人都爆. 我最怕排隊, 所以決定轉移戰場, 向場外開廿四小時既築地すし鮮進發. 入面都幾多人, 不過都有位. 結果我地坐低, 我叫左個おまかせ(即師傳決定), 跟住叫多兩舊海膽壽司. 個おまかせ 真係好正. 好新鮮. 前面個一大舊係鰻魚 (未試個樣), 一樣咁好味. 個餐送多個蟹湯. 好好味 (當然有咪精啦). 埋單盛惠四千日圓.

食完係出面個市場買左D乾魚仔俾我呀爸做手信. 跟住就離開呢個聞名既築地市場. 食唔到壽司大同大和都係有D遺憾. 之後係決定去原宿繼續昨天買野既旅程. 因要係銀座轉JR, 個間鋪頭又十二點先開, 所似決定係銀座行一陣子. 其實時間唔算太多, 我同我同事只係去左全日本最大間既無印良品. 其實都無乜野睇. 時間關係, 我去唔到玩具慱物館. 差唔到十點我地就向原宿出發. 為免好似昨天這樣迷路, 我地決定先去搵個間鋪頭. 最多到時兜兜圈. 個間"鋪頭"都幾難搵, 首先佢係住宅區, 跟住仲要係地牢. 又要問人, 好辛苦先搵到. 因為未夠鐘, 所以係附近一間神社行行. 呢間神社同我想像既有些唔同. 都幾新潮下. 因為冇乜樹林呀, 只係有會所, 中間仲有一間教堂, 係咪好奇怪呢. 咁啱有人結婚, 有些地方封左. 總體來說都幾靚. 行到差唔多十二點, 快快手去間鋪頭買野. 都幾貴, 一件毛衣都成千蚊港幣. 不過都幾靚. 我睇中一件. 問佢有冇中碼. 佢話冇. 失望.

買完我同我同事就"分手"啦, 因為佢下晝機, 所似自己一個人返酒店. 我就繼續係原宿繼續行. 多數都係買衫, 冇乜興趣睇就向我下一個目的地進發 - 中野.

中野係動漫珍品集中地, 個度有好多玩具精品館, 懷舊漫晝區, 電玩中古店. 我係個度足足抖留左兩個幾鐘. 因為好多野睇. 好多懷舊玩具. 全部都好貴, 仲貴過香港好多倍. 呢度中古店既nds 碟仲平過出面, 當然唔會放過, 買左一盒game :p 最後係一間超市俾我買到其中一個朋友要我買個d 紫菜粉.

行完都好差唔多晏晝三點鐘, 但仲要買手信, 所似向著上野出發. 係中野坐總武線去神田轉山手線. 一出上野, 又係好多鋪頭. 個市集好多好多人. 我目標係一間運動鋪 (sports zyuen), 搵左一排先搵到. 有好多層. 去睇左網球同排球兩層, 揀左好耐, 最後都俾我買到一件可似送到俾人既手信. 之後我隻腳俾訊息我, 話夠啦, 要離開. 無可奈可之下唯有打道回府. 本來諗住夜晚可似去台場睇睇. 但冇相機, 隻腳又抗議, 冇辦法, 唯有返新宿.

返到新宿又要諗食乜東東. 去左新宿東個邊, 係咁行都諗唔到. 買左到個咖哩豬肉飽, 諗住做宵夜. 跟住諗唔到返去新宿西個邊. 求其搵間鋪頭, 入去"禁"機買飛食豬扒蛋飯+烏冬. 盛惠六百八十日圓. 食完急急腳去newdays 買多兩盒手信, 一罐啤酒 (做宵夜. 過嚟之前諗住日日試新啤酒, 結果冇試)同一杯北海道軟雪糕. 買完又急急腳返酒店.

返到去攰到呢!!!! 即刻沖涼, 坐係床到休息睇電視. 過左一個鐘又肚餓啦 :p 食宵夜. 食完繼續睇電視. e...神田志美同反町隆史做既電視節目幾好睇喎. 故事好似講反町所飾既捧球員瓜左, 但佢靈魂付左係一個公司老闆身上咁上下既故仔. 睇睇下眼訓 (啤酒作怪同今日真係行到好攰), 訓覺. 聽日返香港啦, 好緊張 :)

第七日就係咁, 係疲倦之中玩完啦.

日本遊(八)

終於到左conference 既最尾一日, 朝早又係冇乜新意, 食早餐, 上悶堂. 晏晝個陣當然會去目及下食乜東東, 發覺係沙爹雞. 冇乜興趣, 最後同同事去左北澤俱樂部食迥轉壽司. 食晏好鬼多人, 好彩仲有兩張櫈剩. 好多日本人都係叫另外order 壽司, 唔會等轉盤個d 普通野. 對我o黎講都唔普通. 食完生蠔, 新鮮海膽, 吞拿魚腩, 蟹腳, california 卷. 全部都好好味. 最後食左十三碟埋單. 唔算多但已經夠皮. 今日己經打算唔上晏晝第一堂, 出去買野.

其實我係陪我同事去買野. 佢要幫我隔離個位hs 同事買毛衣. 佢俾幅地圖我睇話係新宿喎, 咁我地咪跟住搵囉. 撞鬼, 搵極都唔對路. 係咁行都唔見間野. 後o黎再問係路邊個d 交便所 (即小型警局), 佢搵左一陣就左幅圖我地睇...嘩, 唔係話, 遠到呢, 我諗行成個鐘都未到. 後o黎試下行啦, 撞鬼, 行左一陣, 再睇街邊d地圖, 我地只係行左一小段. 有冇搞錯呀, 個hs同事有冇俾錯地圖架. 我再問我同事拎地圖o黎睇. 下, 又話新宿既, 點知發覺個地鐵站係"harajuku" 唔係 "shinjuku". 即係......原宿. 差好鬼遠喎. 跟住咪死死地氣行番酒店, 返到去攰到呢. 係房坐一陣又落番去上最後一堂.

上完堂又決定唔去closing ceremony (其實冇乜人知有呢樣野), 出去同個new york 同事食飯. 去左近歌舞妓町既一間拉麵鋪食野. 我剩係食左一碗烏冬, 因為諗住跟住會係街邊食小食. 食完就各自shopping, 我即刻坐車去池袋. 因為要去搵一間sanrio 既精品店, 幫人買hello kitty 筆. 去到都好鬼多人. 搵左一陣終於搵到. 睇下d筆, 大部份都係made in china. 好辛苦先搵到兩支日本紀念版 (唔係中國製造既) 同一支我朋友話要既"cutie" 筆. 買完又係個頭週圍行. 因為太夜, sunshine city 都閂左. 唯有係個頭行一陣就返酒店. 當然返酒店之前會品嘗一杯好味既北海道軟雪糕.

返到酒店開始執下d行李. 發覺都幾爆. 所似托我老細幫手拎少少野返o黎. 去個時係半喼去, 返就全喼返.

電視仍然都係咁悶, 冇野睇........咁就完左第六日啦. 聽日就辛苦咯, 係要坐車周圍走.

日本遊(七)

今日係嚟日本既第五日, 朝早一如似往食早餐, 上悶堂, 到break繼續xyx@* 呢個conference冇野食. 今日晏晝係optional free city tour, 我冇參加, 因為去埋個d 淺草, 秋葉原, 全部我都去過, 駛鬼跟大隊咩. 所似趁住呢個晏晝去玩個夠本. 因為未去過迪士尼sea world, 所似決定同同事去一趟. 臨出發前都睇下個lunch 食乜, 睇下會唔會有d改善. 點知今日係食........煙肉. 離晒大譜, 食早餐咩, 又係yxu$#*&@ 一輪之後返房換衫, 向迪迪仔出發.

為左爭取時間, 我地係newdays便利店求其食左個麵包就坐 jr 中央線+京葉線去到舞兵站. 跟住轉迪士尼列車 (250日圓), 去到sea world 個站. 途中經過original 既disneyland 同 resort.


去到sea world 入口, 俾低5800 日圓, 通過一個所謂檢查站之後, 就會見到一個好大既地球儀. 睇下個錶, 咁啱兩點半, 中間個湖有show 喎. 拿拿臨去搵個好位睇show先. 晏晝熱到呢, 個太陽又好鬼曬. 最後搵到個比較好既位 (但都係多人架啦), 開始欣賞個show. 一如似往, 全部日文. 個湖中間升起左個扮女神既人, 跟住幾架水上電單車係個湖到飛o黎飛去. 之後有幾架四不像既物體係四方八面出現. 我同我同事講呢幾隻四不像真係核突到呢. 但當然d細路仔好鬼興奮. 大家仲拍晒手跳起舞添. 雖然係咁, 我當然有影相啦. 呢幾隻四不像艇上面又出現左迪士尼裏面出名既卡通人物, 唐老鴨, 嘉非狗, 美妮等等, 米奇就著住王子服裝係中間條柱 (即個個女神企既地方) 出現. 佢一出現, 當然全場尖叫啦.

之後呢幾隻野上左岸, 同班舞蹈人員一齊跳舞. 其他人梗係唔會放過呢個機會, 係咁影相啦. 過左一陣, 佢地又上番隻艇, 係個湖遊嚟遊去, 放左幾下煙花. 日光日白(太陽仲要好曬喎)放煙花, 覺得好奇怪. 完啦, 我地向另一個地點進發 - 神秘島. 係呢度, 可似入一個類似火山既地方 (地心探撿之旅). 係入面坐一架lift 落到地底 (話係幾萬米喎....). 跟住坐一架過山車, 唔算真係太快, 啱我呢d好怕坐過山車既人. 沿途有好多地底野囉, 去到尾見到煙以為完啦, 點知原來係係個火山出面沖落去, 嘩..........吔完.....完事. 都幾好玩. 跟住過左隔離海底兩萬里. 都係玩類似野, 坐係架艇到當落左去海底好深既地方. 見到好多怪野, 中間又扮俾八爪魚襲擊咁呀. 因為平日, 唔駛拎fast pass, 好快玩到. 好彩冇見到人"mou"係度呀, 打尖呀, 周地哇痰個d討厭野.

玩完去左隔離美人魚礁湖, 呢個主要俾俾細路仔玩, 唔啱我地. 不過真人美人魚show都幾好睇. 影相個陣見到一個香港人好鬼黑人憎, 佢企係個公仔面前, 係咁叫佢老婆點楂機. 佢老婆未搞掂佢仲係慢慢教. 其他人等緊佢行開影相. 　

睇完又行過隔離阿拉伯海岸. 同美人魚礁湖一樣, 多數係俾細路仔玩. 又係睇show, 今次係一個要帶立體眼鏡睇既4D神燈劇場. 點解係4D? 因為最後有一下, 個燈神踢人, 大家張櫈係感到好似俾人踢咁架. 之後都有玩一個坐住隻艇兜下兜下, "體驗"仙巴環遊世界既經歷. 噢......發覺部相機冇電....救命呀.........!

玩完又過隔離失落三角洲玩indiana jones (temple of the crystal skull). 同地心探險之旅一樣, 又係要坐過山車既. 唔算太快. 最後架車又係由高衝落去. 原來有影相架喎. 睇番自己個樣, 係dup低頭, 兩隻手楂得好緊個種. 梗係啦, 我好驚玩過山車架. 所似之後我冇玩一個三百六十度轉既過山車, 我同事自己一個人玩左. 佢話冇乜野喎, 我話唔係呀, 見到都驚. 我個心承受唔到呢d刺激.

玩完都夜晚五點幾, 個天開始好黑. 我地繼續去發現港玩風暴騎士. 呢個係模擬坐係架飛機到, 向一個龍捲風風眼進發. 都幾刺激. 玩完成個人都好濕.. 因為係咁淋水落o黎. 當然唔算落湯雞, 但要用毛巾仔抺乾囉.

之後本來想坐遊船遊一個圈, 點知因為準備夜晚個show 已經停航. 唯有走去坐架火車兜一個圈. 兜完見到tower of terror. 未玩我同事已經講左係點玩 (佢係美國玩過喎). 佢一講到free fall 我就心寒. 後來見到條隊好長 (又冇free pass啦), 所似冇玩... :p

諗住睇埋夜晚個show先走, 所似開始買手信, 朱古力呀, 糖呀, 筆呀, 明信片咁呀. 買完差唔多七點半啦喎, 準備去地中海港灣睇show. 我地霸左個幾好既住架. 點知.........七點四十五分落大雨. 有d人開始走啦. 我風褸有帽, 所似可以頂下, 但我同事冇, 唯有用膠袋頂住. 但越落越大. 最後決定走人. 無奈之下離開左啦. 唔緊要, 係香港一年都睇成幾廿萬次煙花架啦. 可似想像係點 :p

出到新宿都九點啦. 肚餓到呢. 最後去左白木館 (話apm都有一間喎). 叫左燒雞翼, 魚生, 沙律, pasta 咁. 食完帶著疲倦既身體返酒店. 今日雖然好攰, 但都幾好玩. 我終於去晒日本兩個迪士尼啦. 開心 :)

第五日完事! 聽日係conference 最後一日啦. 時間好鬼快.

日本遊 (六)

完左公司之後要諗食乜"好野". 我同事又係問我去邊度食....我又要諗. 另外一個話要買野俾佢個女, 唔知係邊度買, 咁我又要帶佢去搵. 我覺得好似做導遊.

我地一去就係伊勢丹. 今次我好叻, 冇去錯層數. 見到sanrio 精品店, 幫人睇睇有冇想要既筆買. 搞錯呀, 咁大間鋪頭, 竟然冇筆買. 之後我地就去左time square 14樓食飯. 入左一間有shabu shabu 同 sukiyaki食既鋪頭. 點知有另一個插曲. 話說我地三個人, 咁咪諗住叫一個shabu shabu 餐, 一個sukiyaki 餐, 諗住可似share 食. 我叫餐個陣, 個女侍應好大反應話唔得呀. 張檯得一個爐, 要食兩樣既話要另外搵一個電磁爐嚟, 我話冇乜大問題喎. 佢話有問題. 可能我日文比較差, 始終唔覺得佢講既係大問題. 結果佢好似冇乜耐性, 都係幫我落左單. 跟住梗係搞到成檯野. 個shabu shabu 餐真係好少, 得個幾塊肉同菜. 後o黎我發覺個女侍應寫錯單, 寫左一個冇魚生食既餐, 因為唔飽, 所以另外叫多一個魚生拼盤. 都算啱啱好. 不過呢間餐廳既服務態度真係超麻麻. 埋單二萬三千日圓. 係咁多日最豪既一餐.

睇睇由朋友部機影同我部機既幾幅相.

食完呢餐都差唔多十點幾, 高島屋都閂埋. 冇野行, 所以就行返酒店. 期間見到藥房, 又入去幫人買野. 最後當然係去newsday 便利店食北海道軟雪糕啦....kakakaakkakakka
咁就過左第四日啦. 跟住個日就係去迪迪仔玩啦 :)

日本遊(五)

第四日朝早晨早七點起身. 沖過靚涼之後落去食早餐, 原來可以係四間餐廳揀架喎. 兩間係洋/和食自助餐, 一間係純和式早餐, 一間係純洋式早餐. 我當然係食洋和混合式自助餐. 可能太早, 見唔到其他朋友或同事. 食完又上房, 見到張英文報紙, 諗起phil 想要日文報紙, 決定同reception 講跟住幾日要日文報紙 (朝日新聞), 咁我就可似慳番筆. 哈哈哈.

九點幾係個conference既開幕禮, 落到會場, 嘩, 乜搞到好似個d十七大咁, 一排排檯咁. 我同我同事講, 唔知駛唔駛好似十七大開會咁, 個個"扒"係檯到係咁寫寫寫 (我成日都唔知呢班人係度寫乜, 唔通學緊速記? :p). 跟住大會開始就搵左三個穿著日本和服既女仕o黎奏日本傳統音樂. 撞鬼, 我又同我同事講, 晨早播d咁鬼慢既音樂, 想所有人訓晒咩. 果然, 係我週圍目及既時候, 發覺好多人都好似頭咠咠咁.

好辛苦聽完幾個好悶既opening speech 之後, 跟住就係睇video既時間. 呢個video主要講亞洲每個市場既最新動向。己經好眼訓架啦，而家又熄晒燈, 唔訓就奇. 我都訓左一陣 :p 又好辛苦咁捱左個半鐘, 好期待既午餐到啦. 唔知係食sushi 定自助餐呢. 好開心咁同同事一齊去午餐會場. 見到好多人排緊隊喎. 諗一定係自助餐. 點知.....見到食乜之後, 唔好意思, 我係心裏面講左...... "有冇搞9錯呀... 咁大個conference, 可以俾呢d人食..... (下刪千個xyz)". 俾3秒你諗下會係乜
.
.
.
首先係好似以前住dorm 個陣咁每人拎個盤, 拎隻碟, 跟住第一個人serve 漢堡扒一塊, 第二個serve
青荳紅蘿蔔粒, 跟住自己拎碗湯同甜品. 簡直係....zyex@#y. 我同事即刻約左朋友出去食. 我就因為拎左野, 所以唔好意思走. 仲要坐係老細個檯, 左面班人傾公事, 右面班人已經唔熟, 講既又係無聊野, 對面老細就話要諗farewell party 表演乜. 仲叫我地幾點要約埋香港o黎個班人一齊諗. 我之後同佢講我個晚約左人 (事實係我唔鍾意應酬呢d無聊活動. 可能因為咁, 最近hr 派個360度evaluation, 我老細俾我 interpersonal relationship 既分係2點幾, 5 分最高分, 其他同事俾我4點幾分. 你話係咪差別好大呢!!!!! 其中一條問題問我係咪lead the team with spirit and with high morale, 老細同同事既分又係咁大差別. 可想而之我老細心目中係幾咁唔鍾意同佢地來往 :p )
. 我拿拿食完, 寒喧一陣就急急腳咁話我出去行下, 因為對住佢地好鬼悶.

趁剩番個一小時, 我去左附近bic camera睇電器，d mac 機真係好鬼靚, 但係貴到抽筋. 跟住睇到ericsson出左部 mp3機, 個樣好似電話, 幾ok, 又可以錄音. 不過我已經有ipod, 所似唔駛啦. 快樂既時間真係好快過, 好快又行完個一個鐘.

返到酒店繼續晏晝session, 都係個個字..... 門+心. break 個陣諗住有d野食啦, 點知乜都冇, 剩得野飲, 呢個咩conference 嚟架, 慳皮得咁緊要. 我老細笑話第二朝係早餐要食飽d. 唔係餓死都似. 到五點半, 完啦. 好野. 為免第二個禮拜一返工要睇email, 問我同事借左部notebook, 不過要係半個鐘之後俾番佢, 因佢呢晚要部notebook做野. 係呢半個鐘係趕死, 因為又要換衫, 又要睇公司email, 又要覆, 又八卦睇下自己私人email. 最後唔理啦, 寫個email 俾自己team members, 同佢地講我冇時間睇佢地d email. 禮拜一朝開個會, 叫佢地到時update 我好過. 就係咁, 完左呢一日既公事.

咁私事呢, 睇下一篇啦 :)

日本遊(四)

去到酒店.....嘩...好多人等check in. 見到我老細同一個舊同事. 佢地都o黎呢個conference. 搞左一陣, 終於可似上房. 一打開到房門. 搞錯呀, 咁鬼細架. (我有一個同事就俾人upgrade 左去deluxe, 大一截). 跟住梗係左睇右睇啦. 搞錯二號呀, 冇夾萬既, 搞錯三號. 個廁所好鬼化學, 入到佢可以聽到地板et et 聲. 冇辦法, 傳統既cubicle toilet.

好啦, 出發食mum mum. 我拎住本地圖. 其他個兩個同事就乜都唔拎. 唔駛講旨意晒我帶佢地去食野. ok, 佢地話想食拉麵. 所似我跟住本書, 帶左佢地去思い出橫丁既ラ－メン若月食拉麵. 個條巷係好窄. 好多細鋪頭仔, 好地道既拉麵鋪頭, 要坐bar 檯個種. 叫左招牌既手打豚醬湯底拉麵. 每碗四百日圓, 叫多一碟餃子同一支啤酒. 好鬼好味. 唔記得影相. 叫野同叫人埋單等等我一手包辦(應該收番佢地d小費) 跟住梗係未飽啦, 去左隔離ふくはち食串燒. 一坐低佢就要我地叫野飲先, 搞錯呀, 咁都得. 跟住先俾個英文menu o黎, 我地叫左拼盤, 燒茄子, 燒魷魚, 目刺燒 (即類似多春魚)等等. 全部都好鬼好味. 埋單三千日圓.

食完各自行街, 我冇乜目的週圍行, 由新宿西行去新宿東, 經過時代廣場(即高島屋出面個廣場). 跟住去左高島屋, 差唔多收鋪. 去左隔離間書店. 睇左一陣走人. 唔知自己係邊, 所似係咁兜圈. 後O黎發覺有uniqlo 喎, 拿拿臨走入去, 睇下D衫, 都唔平喎. 最後買左三對襪 (一千日圓)同幾件底衫形T-shirt (都幾好著架喎). 係入面聽到好多廣東話, 好多香港人, 佢地真係好似上倉咁買. 我諗緊我係咪太節儉呢 :p

買完uniqlo 又週圍行, 死, 又迷路. 自己去左邊都唔知. 後o黎先搵到自己方向. 向伊勢丹前進. (點解要去, 因為要幫人買野). 本來諗住去七樓精品部. 點知自已去左b1食品部 (我係唔知自己係b1出左lift) . 跟住咪睇下朋友要買個d食品囉. 冇, 走得, 跟住諗點解冇得落樓下既. 跟住係咁搵樓梯. 都冇. 噹噹噹, 要收鋪啦. 所似咪拿拿臨搵lift 去番地面. 入到lift先知自己係b1, 真該煨. 上到地面, 個個女sales 都九十度同你躬身講再見. 好有禮貌. 我好衰咁諗, 梗係啦, 佢地可以放工啦嘛 :p

去完伊勢丹啦, 跟住見到藥房, 咪入去搵朋友要既野啦, 搵唔到. 個sales走埋o黎話冇呢隻牌子架啦, 得另一隻. 我咪問佢係咪一樣, 佢話係. 三日之後, 我係另一間藥房竟然俾我見到我想買個隻牌子. 我想返去燒佢間鋪. 搵我笨.........七. 但又發現間藥房買另一隻藥平成300日圓一盒喎. 我之前係錦系町又做左老襯.

我之後係咁搵雪糕食, 冇既 :( 咪入火車站, 諗住唔會再迷路架啦. 救命呀. 入左旺角加銅鑼灣混合區呀. 我又要向上望咁行路. 行下行下好似又唔啱方向既. 又擋失路. 噢. 跟住兜下兜下俾我返到酒店附近. 見到一間便利店有雪糕買呀. 仲係北海道軟雪糕呀. 好味. 由個日開始, 我係一日一杯, 太好味啦. 食完又過對面間yodobashi 睇個d 靚靚電話, 真係好鬼靚呀.不過有d pocket pc 成隻大牛龜咁, 好核突.

之後返酒店, 俾我撞到一個科林人. 其實之前我覺得我都會撞到佢. 點解我會咁覺得我就唔講啦. 但見到佢始終都係覺得奇怪. 點解, 我都唔想係度講. 寒喧左一陣就各自散band, 我返酒店休息睇電視. 著住個件日本和服袍好舒服 :p 跟住睇一個節目講一班演奏樂團點由開始招募新團員, 到練習至最後演出. 十點幾左右, 搵我老細, 拎d野俾佢 (之前有同事托我拎野俾佢). 去到佢間房熱到呢, 後o黎發覺佢冇開冷氣. 佢仲問要開架, 唔係自動架咩? 我話d bellboy拎行李上o黎個陣都有講啦, 冇聽架咩 ............. 佢間房又係deluxe, 真係正.

大約十一點左右, 有bell boy搞門, 我開門, 佢俾左個adaptor 我, 我用英文問佢做乜事. 佢唔知我講乜, 我咪慢慢講, 佢都唔知我講乜. ok, 又講日文. 佢先知我up 乜. 佢話我打電話問拎個adaptor. 我話我冇打過電話喎. 佢好快咁講sorry 就走左. 好有混吉feel.

打完個電話返香港之後就訓覺. 張床都唔好訓, 個枕頭又軟拉拉. 跟住又聽到樓上隔離et et聲. 我諗唔係撞鬼呀. 後o黎冇啦, 但我din左一段時間 (我諗都有一個鐘)先訓得著.

咁就結束第三日啦!

日本遊(三)

第二日係公司既seminar. 個日係日本公眾假期, 返到公司冇開冷氣熱到呢, 好似焗桑拿, 好彩後尾搞掂. 今日比較悶, 晏晝食三文治. 夜晚係去左永田町一間酒店餐廳食飯. 食fusion, 好難食. 返到錦系町個陣自己又出去行下, 去左無印目及目及, 好似平過香港喎. 不過冇買野. 又係超市睇下有冇朋友要買個d乜鬼倒係飯上面個d味粉喎. 搵唔到就走人. 行番酒店個陣有個日本佬走o黎係咁講野. 我冇聽佢講乜, 但估佢係扯皮條. 因為佢係佬都走去問人. 返酒店個條街都幾多呢d人.

第三日係公司seminar 最後一日. 朝早已經overrun, 搞到食lunch 個陣要一路食一路聽presentation. 咁啱個個presentation我係有野問, 所似好狼狽. 今日晏晝都ok, 有炒麵同凍左既炸雞翼食, 好過冇. seminar 最尾個個session 係discussion, 我因為代表我部門, 所似要講好多野, 但時間關係, d問題冇解決到, 所似都係"晒氣". 跟住就拿拿臨同同事返酒店拎埋行李坐的士轉去新宿酒店. 其他同事話會坐jr 過新新宿, 我話唔得, 因為件行李好大. 呢次又係我日文大考驗. 個bellboy 已經同個司機講我地去邊. 點知佢搞唔掂佢架車上邊部gps, 我話佢聽佢打錯字. 佢都係搵唔到我地間酒店. 後o黎要搵個地址俾佢. 佢話睇唔到 (因佢係老人家一名), 我要讀俾佢聽. 佢搞搞下先整掂. 坐左差唔多廿五分鐘至半個鐘, 成謂四千四百yen (即300蚊港幣左右) 好鬼貴, 好彩可似claim, 唔係唔好係日本坐的士.

夜晚都發生幾多事, 容後再談 :p

日本遊(二)

係香港個陣已經借左朋友張西瓜咭(suica, 日本既八達通, 因名字同西瓜一樣　スイカ, 所似又叫西瓜咭), 第一次去火車站要研究一陣先識點樣運作部機. 好彩後面冇人排隊.

去到秋葉原仍然好似六年前一樣多人到不得了. 諗左一陣結果係電器街出站. 出到去見到好多鋪頭呀, 好鬼興奮. 一行埋去睇d價錢, 噢..... 乜貴左咁多既. 香港一支手指都係百零蚊, 但係日本同牌子要成二百幾蚊. 睇下算啦咁.

行左一陣 (其實都冇乜目的地, 見到電器鋪, game 鋪就貢入去目及野), 見到中古game 鋪, 開心到不得了. 入到去睇d 二手games 價錢, 好平呀. 我大game 係會幫襯正版既, 細game 唔好問啦, 心照就得啦. 呢d大game 係香港要成三百幾蚊, 呢度既二手game 平成一半有多. 點可似唔買呢 :p 最後買左兩隻games (機械人大戰w 同 zelda). 個樣都鬼新. 係離開日本之前仲買埋 final fantasy - ring of fates. 有諗過買隻wii (dragon quest), 但諗左好耐, 最後都係放低.

買完好滿足咁出鋪頭, 臉上當然係度奸笑, 因為真係好平 :) 我係日本買既第一份竟然會係俾自己喎. 買完繼續行行行. 沿途好多lolita既女仔．講真我覺得佢地好核突, 成隻怪獸咁.

一路行個肚就咚咚咁叫. um...第一晚食乜好呢, 兜左幾個圈都未諗到. 後o黎見到mos burger. 有諗過入去食, 因為朋友話日本既mos burger 好味喎. 我係香港食過就覺得麻麻. 最後都決定去食拉麵. 去到拉麵店叫左個乜鬼拉麵 (唔記得左) 同餃子. 好味呀!!!!!!!!!!!!!!!!!!!! 走之前, 問個女侍應路, 我俾佢睇幅地圖, 跟住用日文問佢路. 佢見到我幅地圖係中文, 就話佢識講中文, 跟住我地就講左國語. 一日之耐講左四種語言, 勁嗎? :p

行左四五個鐘之後好鬼攰, 最後坐火車返酒店. 返酒店開電視睇, 都冇卡通睇既, 全部都係講野節目. 睇左一陣想訓, 但可能d味精太勁, 加埋酒店張床唔好訓, 搞到個晚訓唔著, 搞到兩點幾先訓到. 咁就過左第一晚.

日本遊(一)

十月七日係我出發日本既"大"日子, 前一晚竟然每隔兩個鐘醒一醒, 驚死唔知醒起身. 之前一晚已經call了的士. 六點鐘的士司機就打o黎講低車牌. 話六點半左右到. 點知我等到六點七仲未到, 咪call佢, 又搵唔到人, 我等到六點五十分又要call 總台, 佢地都搵唔到人, 佢地咪拿拿臨搵個第二部的士o黎. 係第二部的士司機打o黎之前, 第一部的士既司機打o黎話唔好意思, 去左入氣. 結果我係七點三十五分左右到達機場. 我係九點鐘就好興奮咁踏上往日本既旅程.

飛機都幾新下, d remote 好好玩 :p 因為我自知訓唔到覺, 結果睇左兩套電影, the almighty god 同1408. 兩套都幾好睇. 大約下午兩點幾我就到達日本成田機場. 係機場撞到好多同事. 於是大家一齊坐機場巴, 跟住轉的士去酒店. 點知個的士司機唔知我地去邊, um...我學既日文終於可以派上場啦. haha 搞掂. 雖然講得好核突. :p

去到酒店, 唔理三七二十一, 即刻換衫出發秋葉原. 其實我夜晚公司係有個reception party要去, 但因係optional, 最後我都係skip 左. 秋葉原之旅點樣, 留番下回分解 :p

突然的驚喜

前一陣子收到CFA 的一封電郵, 主要是說將會在香港做一個reasearch, 希望我地可以幫手參與. 每人會有一本書送贈. 我沒有多理會這張電郵. 誰知在星期二下午收到一間research 公司既電話, 問我有冇興趣參與. 咁話晒都啱啱考完, 咪決定幫下手. 約了星期四下午見面. 佢之後又send 封電郵來confirm, 星期三又再來電提醒我.

好, 星期四下午係公司偷走出去, 過海富中心同他們見面. 都幾恐怖下, 入了一間conference room, 後面有兩塊好大既單鏡反光玻璃. 見我面個位(都唔記得佢叫乜名)話玻璃後面有幾位同事係度drop 低緊notes, 仲有攝錄機影成個過程, 因為要俾番cfa個邊睇. (我心諗我地講中文, 佢地識聽咩?)

個會見長達四十五分鐘, 主要問我工作範圍, 同埋對於cfa 想開兩個新continuing education courses 既睇法. 完事就收個cfa本送既書啦, 佢仲俾左個信封我. 我冇打開到, 心諗係個d乜鬼惠康coupon吧了. 跟住我返公司, 係升降機裏面無聊咪打開個信封睇下乜鬼coupon 咁巴閉. 誰知係兩張現兜兜既五百蚊紙. 嘩......正呀. 幾鬼開心. 完全冇諗過有錢收.

後來同同事講, 佢話最好同公司單聲, 當係申報左. 我覺得都係, 所以都乖乖同hr 單聲. 佢地而家睇緊駛唔駛申報. 我之後都有打俾都係cfa既朋友, 叫佢地收到電話一定要去, 有著數, yeah!!!!!!

Facebook

呢輪唔知乜事, 個個都興玩facebook. 最初一個英國朋友邀請我加入. 我就加入左冇理佢, 後相繼收到邀請, 發覺這項玩意越O黎越流行, 就開始玩起來. 之後發覺好多公司同事都加入左, 就你加我我加你咁成為一個network.

Facebook 裏面玩意都幾多, 真係日日新鮮. 又包前鎚, 金魚缸, 送蛋等等小玩意, 越來越多application加入自己個page 到. 而家日日都會入去睇下有乜人send左d乜新玩意過來.

朋友, 你facebook左未?

幾時會痊癒?

離發病開始都差唔多一個禮拜了. 身子還未完全痊癒. 喉嚨還是有少少痛, 尤其是吞口水的時候. 胃口也細了好多. 見到粥仍然有反胃既感覺.

禮拜二證實左係扁桃線發炎之後, 呢五日都要食礦生素. 日日唔係食麭包就係食湯粉. 食量真係好細. 食野都覺得好苦, 冇味. 呢兩日都好早訓, 差唔多十點就訓. 情況好了很多. 起碼飲水個陣唔會好痛. 前幾日簡直痛到叫救命, 一吞水喉嚨就好似撕裂既感覺. 唔想講野但又成幾廿個conference call 要開. 想死 :'(同事問我點解唔休息下. 我都想. 我下面個位同事放假考試, 老細放緊產假. 留下一個好年青的同事係公司. 始終放心唔落.

唔知係咪訓得唔算太好, 條腰而家訓到硬硬咁, 感覺唔係太舒服.

希望快些痊癒, 呢個星期所有活動, 朋友約會已經全部取消. 聽日打唔打到波, 星期日教會弟兄婚禮去唔去到唱歌都成一個問題.

大大力, 加油努力啦 :)

病倒了

禮拜四晚同教會一班兄弟姊妹去了牛頭角明星酒家食飯. 慶祝程姨既生日. 其中一位姊妹把聲沙沙地, 佢話喉嚨痛. 第二晚我和呢位姊妹一齊去了堅道食上堂. 之後一齊食飯同坐車返屋企. 誰知我就賴野啦. 個晚係架車到已經有少少咳同鼻水. 我己經打定底食粒必理痛先訓. 第二朝好似冇乜野, 就去了打波同游水. 個日汚染指數很高, 我打波打得好辛苦. 因為抖唔到氣.

後O黎同呀達去君傲灣食飯. 可能出出入入冷氣地方. 呢D野加加埋埋令我晏晝有點唔係咁舒服. 後尾去教堂練歌, 都知唔係幾妥. 之前都食左粒幸福傷風素打底. 去到發覺唔只我一個, 其他個晚食飯坐係個位病左姊妹周圍既兩三位都病左. 傳染得都幾厲害. 跟住入教堂準備彌撒. 覺得好凍. 後來班姊妹幫我問神父借左件風褸著住先. 諗住可以捱完成個彌撒. 誰知去到講道個陣覺得個人好慶, 又凍又熱. 結果係奉獻詠之前我同PETER 講: 我頂唔順, 要早走.

之後拿拿臨係美心買左個包. 打的飛返維景 (本來想搭地鐵, 但入到地鐵站發覺好凍, 頂唔順), 再落去睇醫生. 佢話有發燒 (101度左右), 係感冒. 我好驚好似舊年十月咁急性扁桃線發炎. 舊年因為咁, 係咁發高燒, 又要去急証室睇病, 去美國上堂既行程又要取消. 禮拜日朝起身覺得好少少. 晏晝又走左去一粥麵買碗粥同腸粉食. 但食左幾啖粥覺得反胃 (可能諗起舊年既慘況). 成日都係咁流汗, 衫都換左幾件. 夜晚突然又發燒, 係102度左右. 唔好咁啦. 唔想好似舊年咁. 即刻拎塊退熱貼出O黎凍凍佢. 成身CHI 立立好難訓. 最後頂唔順, 都要聽呀達講開少少冷氣訓. 咁樣就好快訓著左. 本來今日要去總綵排下個禮拜教會弟兄婚禮既歌. 但咁樣點去到呢.

今朝起身成身冇咁攰同精神D, 係喉嚨仲好痛. 拎個電筒照照, 噢...喉嚨後面係白色..吞口水有D痛. 病徵同舊年好似. 但成日都冇發番燒. 我諗應該好過舊年. 因為咁今日要請病假了. 對上一次感冒請病假就係舊年既黑色十月. 今日都駁命飲水, 飲寶礦力. 希望聽朝冇事啦.

延續的爭拗

好啦, update 下尋日發生既事.

我地約左食完晏之後傾. 係朝早我地部門既team heads上左個hr 既briefing, 係講之前全公司做既問卷成績. 呢個問卷係關於員工對公司既睇法. 呢個briefing 裏面, hr 都有濃縮我地部門既成績. 其中一項係講員工對老細派既野成日都唔知點解要做. 成日都係老細就咁叫做就做. 好好彩, 我知呢個唔係我既問題. 因為次次我都好長氣咁解釋俾下面聽 :p

點解我要講呢樣野. 因為我同我老細傾個, 佢第一樣就quote 番呢樣野出o黎. 佢話唔好意思, 佢應該私底下同我解釋點解會有咁既決定. 如我所料, 佢話

- 佢暫時搵唔到人長做呢份job . 所以搵我頂住幫下手, 因我唔駛花好多時間去接. 呢個係佢諗既interim solution.
- 要迎合好多人既意見好難. 其他 (包括佢馬仔)都唔想接. 佢又覺得呢個只係special project. 佢馬仔想接一個team 做.
- 有一個同事會去印尼做野. 佢話唔知佢3個月後返唔返.
- 跟個好多老闆, 覺得planning 係冇用既. 因為隨時會變. 佢自己既role 都成日變.
- 我係比較senior 既一個 (事實我係排佢之後), 所以應該可以handle 到呢份job. 希望我可以幫下佢.
- 如果叫左我地介紹既人過o黎, 佢驚其他同事擔心第日冇得升.實
- 呀同事戊都轉得好多啦.

我當然遂點駁佢.
- 同事丙走唔係今日既問題, 佢六月已經話走. 七月已經知道十二月唔係度. 跟本好多時間搵人. 唔係到而家先決定.
- 要解決呢個問題, 唔係用interim solution 就得. 要focus on 個root of the problem. 而家只係defer 個problem. 馬仔想接一個team. 咪俾埋呢個佢囉. 都算係一個team 咯.
- 而家話三個月, 聽佢咁講搵唔人個陣, 係咪又到時三個月呢.
- 話team heads太多，　咁我地會走架嘛。　我話我都等緊調出去。　到時咪少一個囉。
- 成日今日唔知聽日事, 係. 到時有好多變數. 但你咁樣俾唔到我地睇成個部門係點走.
- 冇話要三月轉, 我都一月轉啦. 最多你搵個人, 我幫你train up 佢.佢話搵唔到 (題外話, 呢份job 要接觸好多人, 成日都要拗野, 又要揍住個老闆. 以我咁既性格, 都唔明點佢同其他人都覺得我啱做呢樣野. 但又講真成個部門可以做到既又真係唔多. 個個都好鬼乖, 好聽話)
- 我做既工作多數唔夠一年 (佢話我咁senior 唔駛做多架啦) 我話人係不斷training既. 咁唔穏定點training 呀.
- 其他同事唔會擔心冇得升. 因最近都升左兩個人去team heads啦.
- 我話有事就放落我度. 同事戊唔出聲唔代表我都係要咁樣. (同事戊係好林個隻), 我話你可以當我係乜都拗既員工, 我覺得唔公平既就會出聲.

同佢"傾"左個半鐘. 冇火藥味, 但好似打杖咁, 你攻我守, 我攻佢守. 最後我話ok 我可以幫佢三個月 (由十二月至三月), 但係佢十一月底放假返o黎個陣佢要開始搵人接. 到時我會慢慢放手. 佢話知道如果佢呃我既話, 我會走. (事實我可以調去灣仔個邊, 雖然會好多野做) 佢話到時再傾成個部門既棋點放.

你可以話我係"林", 冇同佢撐到底. 佢始終係大肚婆, 唔係好想激到佢好緊要. 環顧大局, 我最後願意幫佢. 但我到時要學識同佢繼續周旋. 尤其十二月做appraisal個陣更加要繼續我"包拗頸"既性格.

爆發的一天

今日係公司終於忍唔住, 同老細頂撞. 聽日會真係炒過. 而家先寫寫發生什麼事.

先講講部門先. 通常我部門每一個STAFF 做同一樣工作兩年會轉一轉, 這樣可以達至training既作用. 先介紹我部門既運作.

零六年一月
工作A 同B - 我
工作C, D, E, F, G, H 同 I 七樣工作就由其他六位同事負責. 同事甲做左工作E 己經差唔多三年啦. 老細都冇轉佢既意向.

到四月又宣怖我要負責 A,B, C 同 D 四個大JOB. 當時真係做到扒係度. 同老細講佢又話我做乜要做到咁仔細. 我冇聲出, 唯有繼續做做做. 零六年十月老細走人, 換左而家呢個老細. 佢本來負責工作E (一樣咁大把), 佢就俾左同事乙負責. 同事乙本來負責工作F. 佢即係要做兩樣野.

零七年一月新老細話我工作量太重 (之前同舊老細傾個陣佢冇乜出聲), 就將我工作A同D 俾左同事丙負責. 佢又同我講呀同事甲做左咁耐啦, 應該要轉啦. 其他同事做得好短日子, 所似要求佢係九月同我調. 當時我同佢講我做 B 同C 都係一年咋喎, 我唔係好想調. 佢話冇辦法, 其他人調唔到, 所以要揀我. 冇可奈何. OK

零七年六月呢個老細話因為佢會九月放產假, 想我係六月尾即刻同同事甲調TEAM. 因想減低佢放產假個陣既interruption. 我話好快喎. 當時我問過同事甲年尾先調有冇問題, 佢話冇, 所以咪同老細講不如年底啦, 到時interruption 咪仲少. 佢話今日唔知聽日事, 都係要快. 結果七月底我就調左team. 當時我同同事甲都好辛苦, 因為當時 工作 B, C 同E 都好多野發生. 好忙.

又係六月呢個時間同事丙同老細講佢會調走 (當時佢係同HR 老細傾, SKIP左呢個老細). 係七月左右已經知道佢會係十二月一號走人. 佢跟住個零月係咁問老細搵到人替佢份工作 D 未 (大JOB). 老細話要見人. 又問其他同事有冇興趣. 同事丙話俾我聽同事丁 (佢既至愛馬仔, 因好聽佢話)對工作A 有興趣, 但對D冇興趣, 其他同事都係對D冇興趣. 以見及此, 我同同事丙幫手搵左一個有興趣呢份工既隔離部門同事. 呢位同事就寫左一封EMAIL 俾我老細. 我老細覆佢話要問下內部有冇人有興趣先. 我同同事丙好奇怪, 佢點解會咁寫. 明明冇人有興趣呢份工.

係老細放產假既前一天, 即今日. 佢叫齊所有Team heads 開會. 開會佢講呀同事丙十二月走, 但又唔想搵番個中層人仕返o黎, 因為佢覺得我地中層多喎. 工作A 就俾同事丁做. 工作D 就俾我做住3個月. 我唔出聲, 跟住話我唔想接. 同事丙跟住幫我話叫我下面做, 我oversee佢。另一個同事講話冇分別喎。我話我已經做過呢個Job, 同埋我唔想同另一個老闆級既人做野, 因好似揍仔咁樣. 其實我話你係3 個月, 不如諗清楚邊個會長期做呢樣野, 等佢早d take up 咪仲好. 佢話今日唔知聽日事, 況且佢呢兩日plan 唔到, 同埋通常3月先轉team. 佢又話想我接多d responsibility. 跟住呀馬仔丁話佢接囉一係. 我好嬲咁話我呢兩年既轉變真係好多. 跟住我靜左一陣話ok 我接. 我老細又話馬仔丁接喎. 我話ok, 你鍾意你接, i don't care.

隔左幾個鐘, 我老細係屋企send 左個email o黎 (佢晏晝放假) 話對我係開會拒絶份job 好失望, 話我set 左個壞榜樣俾d 細既, 聽日同我傾. 我當堂火都起埋, 即刻覆佢話ok, 聽日傾. 我又話我覺得佢應該事前同我傾下先. 同埋我都好失望, 我唔知佢對我既development係點樣. 我負責既工作成日變o黎變去. 聽日預左同佢大炒.

我事後同呀同事丙傾番, 我問佢其實係開會個陣係咪好寸. 佢同我講知道我點解咁嬲. 佢話當時既communication 好有問題. 跟本係action/reaction. 我可以話私底下再傾. 但知道老細咁公開問我點解咁做, 所以我咁答都情有可原.

我嬲係有幾個原因.
1. 你事前就問晒人有冇興趣做. 個個都冇啦就求其搵個人頂住先.
2. 3月轉team 唔係必然既. 我都係1月轉team. 佢話齋, 識變通先得架.
3. 幾個月時間俾佢plan, 佢搞唔惦就求其搵人頂住. 我地幫佢搵埋有興趣既人, 又話中層既人多. 如果係咁, 佢就唔駛請番佢馬仔返o黎啦. (佢馬仔十二用離開公司, 但五六月返o黎做). 再者即係太多中層, 最好我地呢班都走埋啦. (呢句係我悔氣咁諗嗟)
4. 你之前唔同我私底下傾, 就係個會到咁講話要我做. 點呀你, 大石壓死蟹呀?
5. 樣樣都話今日唔知聽日事. 咁不如乜都唔好plan. 到時至算. 咁係對細既係一個好榜樣咩?
6. 話就話人地做左三四年, 要轉啦. 之前又唔諗定, 叫呀同事乙一開始做工作E咪得囉. 次次都係郁我. 點呀. 救火隊呀?
7. 話同事甲好多野做, 又話要加我responsibility. 大佬, 未係七月轉team 之前佢都知我做緊乜, 佢做緊乜. 如果用呢個理由就唔應該轉team 啦.

我承認我係個會到係講多左. 呢樣我會認. 佢話我我無可厚非.

我唔介意做多d, 我以前都試過. 但我係唔鐘意好似成日俾人攞上檯, 做埋d幫佢填tum 既野. 佢鍾意應酬老細, 又話要為老細生存. 痴線, 我冇你咁偉大. 佢鍾意推job. 未做老細之前就話d job 俾番隔離team, 而家我問佢我駛唔駛幫, 佢就話以前呀同事甲都係幫隔離team架喎. 我話ok, 我只係問下佢意見.

如果佢話我懶推job, 我真係會頂佢個肺. 好多job 我都幫佢頂左佢. 同麻煩秘書單野同埋幾份project都係我主動幫佢做.

好嬲, 真係好嬲. 我未試過發我老細忟憎. 佢係第一個. 我預左今次appraisal 唔會有好成績. 我跟本同佢合作好有問題. 令我又諗番起當日我諗轉工, 同事問如果我留低, 我會唔會頂唔順.

聽日繼續.

九月的第一個週六

今朝起身, 見到個天矇查查咁. 心諗都唔駛去沙灘游水啦.

跟住同老友達去左食早餐同打網球. 好好彩, 俾我地"搶"到個場 :p 好耐冇打過啦, 我打到不知所謂. 真係對呀達唔住. 佢好想打波, 點之我打到咁既死人樣. 正反手通通唔掂. 最鍾意既反手界波都唔掂. 結果打左一個鐘左右, 自己話唔打啦, 唔想繼續失望.

跟住返屋企, 望下個泳池, 咦, 好似見到呀港姐同呀周生喎. 跟住就搵青蛙小露寶. 好似唔多見既, 係咪遇溺呢...哈哈. 係等d叔到之前, 繼續打排球機. 後o黎同d叔呀達去食晏. 之後就游水啦. 都幾鬼涼喎. 游左一陣蛙式同好核突既自由式之後, 攰到唔係好想郁. 最後仲走左去暖水池he. 入更衣室凍到呢.........

游完水同d叔打左一陣WII 高達GAME. 好鬼難玩. 要多D 練習練習.

咁就過左一個運動既週六晏晝啦. 夜晚返完教堂之後又開始失落........因為聽日係禮拜日, 後日就返公啦. 禮拜一仲要好忙添. 又要做BCP 倒屎咁早起身, 係咁CALL 人, 返到去又要做一大輪follow-up 既野....諗起都怕怕. um....都係好好享受埋週六呢幾個鐘先 :)

第一盒買既任天堂遊戲

大約廿年前, 我和一位同學去深水埗黃金, 用儲左好耐既一千蚊, 買左一台 CRT MON (唔係彩色, 係綠色架咋喎), 一部任天堂既紅白機, 同兩盒任天堂遊戲帶. 還記得那時我要拎著一盒好大既盒, 由深水埗坐地鐵返北角. 之前其實已經做好夾價既工作, 邊間買MON 最平, 邊間買任天堂最著數. 個陣都係為左一盒遊戲帶買機 - 排球.

買左之後日玩夜玩呢盒排球帶. 個陣仲癲到自己編埋賽程, 幫遊戲裏面D 人物改名. 仲做埋比賽旁述添. 個陣仲成日搵朋友同我玩, 但冇一個可以嬴到我...嘻嘻.

沒想到隔了廿年後既今日俾我見返呢個game. 當然唔係任天堂既帶啦, 係wii 裏面可似download既game. 個日見到, 又好似廿年前咁, 即刻去左旺角, 買左個classic 手制同5000 wii points. 一返到屋企即刻用500 points download 呢個game 玩.

覺得真係好好玩, 比起之後出個d 好好多. 但仍然好生疏. 我會繼續努力. 盡快回復廿年前既水準. yeah v^<>^v

生日過後

為期幾日既生日慶祝暫時告一段落 (仲有一餐下個禮拜 :p ). 首先感謝各位朋友既祝福, 賀禮及款待. 今年最喜歡既禮物係一個運動袋, 因為好啱用, 嘻嘻!

最近我地個團又接幾單結婚唱歌既邀請 (我地成日笑好似接job 做, 遲d應該要設計一個網頁, 將我地既"演出" 放上去, 好似市場推廣等人欣賞, 又可以繼續接新job :p), 遲d又是我堂既主保瞻禮, 十二月我地又要做服務. 所以我地而家開始都要成日練歌. 同呢班"友仔"練歌其實幾好玩, 雖然有部份年紀比較年長少少, 但都好好傾同好玩得. 練歌變左做一個派對. 但當然大家都好認真. 始終是為主既服務. :)

尋晚練完歌同呢班"友仔"去寶琳食飯 (差唔多夜晚十點幾), 去到酒樓, 大部份既人都走左啦. 唔知係咪d廚房佬趕住收工, d餸o黎得快到呢. 碟碟又大碟. 我地又笑可能佢地趕住收工, 所似將剩番既野一次過俾晒我地. 呢餐豐富咯, 乜鮑參翅肚都有, 最後每人都係百三蚊落樓 (我唔駛俾, 因仲係壽星公 :p ). 其實都算抵架啦. 食完返到屋企都十二點啦.

熱鬧過後又回復平靜, 又要好好迎接第二天既來臨.

牛一

仲有兩個鐘就係小弟既牛一. 又老一歲啦. 講開生日, 我以前個team 很得意, 總共五個人. 我和一個同事同一日生日, 而另外又有兩個同事係另一日同日生日. 真係好橋. 但又因為咁, 成日要同我同事夾放假日子. 通常我會正日放, 第二日讓俾我同事放.

有日同朋友傾計, 講識既人多數邊個月生日, 諗諗下我識既人多數都係一月, 二月, 八月, 九月, 十月, 十一月同十二月生日. 最多係二月同八月 呢d時間多數都唔係最熱既日子, 唔通以前d人生之前係計過架咩?

以前讀書個陣, 生日唔係太多人願意慶祝. 點解, 因為第二日就要返學, 咩癮都冇. 都幾慘架. 邊年既生日最難忘, 我諗應該係十八歲個年既生日. 當年生日係澳洲間中學過既. 個晚有好多人 (我諗六十幾七十人)同我慶祝, 真係好開心. 而家睇番d相都好鬼開心. 有d同學仲話個晚要扔我入洗衣機添. 好彩冇嗟 :p

人越大, 越覺得生日係平常事. 冇以前咁著重啦. 只係想同自己既友好聚一聚吧了.

男與女

昨晚臨訓前看聖經創世紀篇, 第二章講述男人要依附自己妻子, 二人成為一體. 婚姻既神聖由此可見一班.

但是今朝收到以前中學一個老友既電郵, 講佢剛在上個月和他結了九年婚的太太分開了. 有點兒可惜.年前的他就是在六/七月結婚, 當時因為我快要移居澳洲, 要返公司完成手頭上的工作, 只是答應替他作婚禮的主持人. 那時候仲俾佢"哦"左一陣, 話佢結婚我仲要返公司做野. 他的婚禮在聖瑪加利大堂舉行. 當時真係好開心. 睇住自己既老友踏入另一個階段.

呢個老友以前同我一齊打波, 一齊返學同放學. 佢係我去澳洲讀書之前送俾我既張送別咭我而家仲留起. 當時佢仲成日打電話同寫信俾我. 後來當然重色輕友啦, 次數少左. 而我係澳洲做野個陣, 佢仲同佢太太一齊O黎澳洲探我. 後O黎佢地生左一個囡囡, 我就順利成章做左佢既God Father.

婚姻真是這樣兒戲嗎? 說真的, 我會覺得如果不是想要小孩子, 結不結婚都不是太重要. 獨身都有他的好處. 看見一對對幸福的夫婦當然是羡慕, 但都見到很多不愉快的婚姻, 最後都是離婚收場. 覺得有點兒可惜. 兩個人相處真是要點學問.

但願我呢位老友能夠振作過來. 繼續撫養他可愛的囡囡. 願上主保祐他及他的家人, 亞孟.

中國女排二談

為期一個月既世界女排大奬賽係尋晚終於告一段落, 歐洲黑馬荷蘭一嗚驚人以五戰全勝勇奪第一. 東道主中國以四勝一負既佳績得第二.

其實呢個月既中國女排真係可以話係先死而後生. 係初賽不斷輸波. 全部輸俾歐洲球隊 - 波蘭, 荷蘭, 意大利 仲有死敵古巴. 十二支隊伍排第八. 唔係東道主既關係, 一早已經俾人淘汰出局. 當時真係一路睇, 一路鬧, 有冇搞錯呀, 呢個打成咁, 個個又打得咁差. 成支業餘隊伍咁.

總決賽係寧波舉行. 第一場由中國對荷蘭, 頭兩局都係deuce個陣輸, 好唔抵. 後o黎中國連追兩局. 點知第五局打到一pat 野. 睇到心痛又忟. 結果輸左. 哎......當時想好大機會六隊排第六, 同埋俾人講靠東道主先可以入到決賽.

第二場對波蘭. 其實冇心機, 因為預左會輸. 今次都係打足五局. 主攻手既回勇同二傳手"訓醒" 終於令這支隊門唔駛又係第五局輸波. 終於開齋. yeah.

第三場對意大利, 呢場仲擔心. 中國呢三年對意大利六場, 剩係嬴得一場. 意大利可謂中國既克星. 今年意大利仲加埋以前古巴藉既球員, 攻擊力超強. 但中國人既鬥爭心充分發揮出o黎, 再o黎3:2力克意大利.

打完意大利後, 中國好似上左身咁, 鬥志好旺盛, 兩場3比0嬴左世界第一既俄羅斯 (舊年世界錦標賽冠軍既full team 添) 同埋世界第二既巴西 (雖然有兩個主力冇上, 但初賽係排第一). 呢兩場每一個位都打得好好, 攻擊同防守係呢三年裏面我睇咁多場最好睇既兩場. 新快攻薛明越o黎越勁, dup 波十足古巴個d球員咁, 快攻可以三米落地, 仲係好大聲個d喎. 新二傳分配波好合理, 真係點點開花.

最後中國拎埋最佳發球, 最佳二傳同埋最佳自由人. 呢班後起之秀真係勁呀. 繼續努力. 九月仲有亞洲錦標賽, 到時打敗成日好鬼自大既日本隊啦..... go go go china yeah

v^<>^v

張學友演唱會

尋晚去睇張學友演唱會. 買左$250 飛, 坐24行, 斜斜地對住個舞台. 都算唔錯. 今次佢個舞台好靚, 好似d 舞台劇既setting. 好grand. 入場既觀眾多數係成熟既成年人. 哈哈. 冇乜靚妹個d呢.

演唱會八點廿五分開始. 一開始就整幾首快歌 - "愛火花"," 頭髮亂了"同一首唔識既國語歌. d音樂好大聲, 基本聽唔到佢唱乜. 跟住就o黎幾首慢既經典歌. 成個演唱會以經典歌做骨幹, 快歌做配襯. 很奇怪, 一唱呢d舊歌個陣, d歌詞就會係個腦到走番出o黎. 跟住就會一齊唱. 好正. 演唱會又用左好多煙花效果, 好靚. 尤其係開頭個陣. 點靚就唔係度講, 唔係買左飛既人就會冇晒驚喜 :)

中段唱慢歌個陣, 用左好多顏色做配襯, 又係好靚既配合. 一首"紅色" 配似全個紅色既燈光, 加埋紅色衫既舞蹈員, 襯到絶呀.

有一段時間係唱人地d歌, 本以為佢係呢段時間會唱王菀之既"我真的受傷了". 點知佢唔唱住, 係encore個陣先唱. 唱楊千樺個首"小城大事"個陣, 佢冇好似第一場咁甩嘴啦.

之後係愐懷時間, 佢太太, 囡囡同埋呀梅. 呢part 比較感性同好有意義.

後下半段係三十分鐘既雪狼湖+如果愛既remix舞台劇. 感覺又突然唔同左. 之後就係encore 時間, 竟然唱"夏日動感la la la" 喎. 諗都諗唔到. 呢段encore 時間全部都係經典歌. 我入o黎紅館前心諗, 如果佢唱"藍雨"就好啦. 但諗到咁舊歌邊有可能. 點之突然音樂一起......"灰灰的天, 空空的街..." yeah, 等到啦. 好開心. clap clap clap.

最後係大約十一點半左右, 一首"朋友"作為整個演唱會既終結. 個個都唔捨得走. 因為呢個真係一個好出色既演唱會. $250 真係抵睇. thumb up :)

一身鬆晒

尋日返公司, 一打開個電郵箱就見到CFA 寄來既電郵. 噢. 出成績啦. 好緊張, 拿拿臨跟住個LINK 入去, 入戶口同密碼. 係個幾秒鐘等緊佢出成績個陣都幾緊張. 一見到合格. 成個人鬆晒, 仲叫左聲"YEAH" :P 因為早返工, 所以冇人知. 好啦, 跟住慢慢睇番成績是怎樣. 合格率得一半. 比起上年七十幾八十稍為低了. 第一張卷是寫作形式, 唔算真係考得好好. 還記得第一題用了我好多時間做個題, 出來得唔夠一半既分數. 好彩. 我諗我第一份卷得六十幾分. 第二張選擇題考得幾好 (其實我用左唔夠一半既時間已經做完份卷. 跟住再慢慢睇番 :P ). 我考試就係咁, 好鍾意快快咁做晒先, 跟住先慢慢睇番啱唔啱. 可能其他人總括來講考得不是太好, 所以造就我可以合格. 嘻嘻.

當然個日心情幾好, 一早就放工去買玩具公仔同買paul potts 隻碟. 返到屋企有預感會收埋日文考試既成績. 一打開信箱, 果然有space 寄來封信. 又係好心急咁打開, 見到係"合格" 當然開心. 雖然拎唔到乜鬼credit 或者distinction 我已經心滿意足. 話晒因為cfa 我冇乜時間放係日文到.

個晚好友仲請我食好味既甜品. 正. 返到屋企又見到中國女排嬴左美國. 仲打得好好添. 又係勁開心. 今日幾樣開心事情, 樣樣都有感謝上主. 我次次考試出發前都會求上主賜我一顆平常心, 仍都求聖母代我祈禱, 等我冇咁緊張, 可以將自己學到既野搬番出o黎.

所以所有既榮耀都歸於祂 :)

跟住有乜打算? 仍然要自修日文. 仲有報左教會一個短期音樂課程. 十一月開學, 得八堂嗟. 全部興趣班. 幾好 :)

上司下屬

講開同朋友既聚會, 尋晚同以前兩個舊下屬食飯, 佢地係一對夫妻, 係唔同公司做野. 尋晚仲帶埋個囝囝出O黎, 佢囝囝好怕羞, 但好好玩.

本來尋晚我係諗住問佢地有冇興趣去我公司做. 但點知變左做一個挖角晚飯, 佢地各自都想搵我過去佢地間公司再一次做佢地老闆. 其中一間係我以前舊公司, 因我以前個老細走, 所以有個吉位. 不過真係好好笑囉.老公講一陣, 跟住老婆就插口話都係佢間公司好. 成餐飯又係充滿歡樂聲.

有時自己都幾開心, 起碼知道自己唔算係一個好黑人憎既老細. 以前有幾個同事走之前真係有SEND EMAIL 俾我話多謝我教左佢地好多野. 而家仲間唔中出O黎一齊食飯, 打牌, 飲野, 打波添. 就算而家閒談個陣, 佢地都係咁講. 我真係好開心架. 如果我係信仰上都做到類似咁既褔傳工作, 可能會更加好添 :)

都係個句. 我始終係用心對人, 希望對方都係咁樣對我. 有人曾經話我純情, 其實我好想講, 係你自己將自己既思想複雜化嗟. 傻既唔係我係你.

朋友, 你好

今日收到以前中學時期一個好朋友既電郵, 講我地好耐冇一年一次既聚會啦, 相約下個星期食晏. 我地總共三個人, 係中學時期既死黨, 我地以前一齊打波, 一齊去街, 同對方既家人都好稔熟. 以前仲俾人笑我地係三條雷射光, 因為三個人一齊行, 好似電射光咁. 有一個好朋友我小一已經認識他. 佢又係我大學到讀碩士. 佢而家仲係同行添, 好不合. 佢地都係我唯一可以係紀念冊寫成幾廿頁紙既好朋友.

後來大家做野分開左, 只係維持一年一次聚會. 之後又不了了之冇左件事. 但每次見面都好開心, 因為次次都懷緬以前既事情. 就算好小的事情都會講. 好期待今次相隔左兩三年既聚會 :)

呀肥支, 你就算幾忙都好, 都要記得你身邊一班好朋友呀. 唔駛一定要抽時間見面既. 有時一個電話或者一個電郵既問候大家都會好開心架. 起碼知道你仲記得我地 :P

小福建

北角, 一個好多福建人居住既地方 (我唔係褔建人), 仍都係我長大既地方. 係個度住左超過廿幾年. 覺得係呢區係好方便, 交通設施多啦, 買野方便啦, 但又不失有寧靜既一面. 唯然曾經搬過, 但都係同一條街. 之前搵樓都有考慮港運城, 話晒都係北角 :p

上個禮拜發覺渣華道舊巴士公司宿舍起緊樓, 係由太古同巴士公司合作既, 叫乜鬼港濤軒(好似咋). 突然諗下遲d有得睇既話都會諗下去睇下. 我對北角既感情仍然好深厚. 其實都有諗過搬番香港島個邊, 但一諗起人多車多就怕怕. 再者港島樓始終會好貴, 未必負擔得起. 每次諗起呢樣野, 我會走去窗邊望望, 跟住問自己 "你捨得搬咩?" 一諗到呢樣野我又會諗 "有錢不如買埋隔離, 打通咪仲好" :p

舊北角邨位置遲d都會起樓, 到時一定貴到叫救命, 相信仲貴過嘉享灣. 但都會去目及目及. 目及嗟, 唔係買呀 :p 望下都好呀.

中國女排

今日繼續想講排球. 中國女排係香港站三場比賽, 輸兩場嬴一場. 輸個兩場都係先領先後俾人翻盤. 大家或者仲記得二零零四年雅典奧運決賽, 中國係先輸兩盤後嬴三盤, 打敗俄羅斯嬴得金牌. 個場簡直叫到九彩, 個晚仲好多人捱夜睇呢場波.

呢場比賽雖然嬴了, 但成了之後三年既魔咒. 中國總共有七場比賽係先嬴兩盤後輸三盤. 冇記錯應該係

兩場巴西
兩場古巴
一場意大利
一場荷蘭
一場波蘭 (今次香港站)

究竟係隊員放鬆輕敵定係命運既安排?

中國係呢幾年都輸得幾多場比賽. 今年開始大換血 (足足遲左人地兩年), 所以而家隊裏面既人都好新, 冇乜大賽經驗. 最主要既二傳係由天津既小魏負責, 得十九歲, 中國聯賽都只係打左一年主力就要挑起呢個重擔. 有好多場都睇到佢重有好多問題, 例如同隊員既配合, 自己心理既調整, 過份依賴主攻, 傳四號位既波太高太慢. 其他老隊員既狀態好差. 唔係俾人睇死條路, 就係自己唔夠氣. 而家既中國冇左零三零四年個種多變, 戰術太單一, 好快俾人識破. 開波開前排或者開俾接應 (劉或周都係一樣), 就已經可以破壞中國走動既變化. 意大利前教練(而家係波蘭教練)深明此道, 所以俾人譽為中國既克星. 最慘中國既主攻而家好弱雞 (舊年既新星王一梅因為年頭練習時受傷, 暫時未有隨隧參賽), 唔可以打死對方. 慶幸舊年練出個王一梅, 今年殺出左個副攻薛明. 後者今年光光茫四射. 欄網同進攻都好勁, 但弱點係二號位進攻不多.

希望今年年底四大主將復出, 到時真係豪華陣容. 心目中出年十八人既奧運集訓訓練名單, 紅色個D係心目中既最後十二人出賽名單

主攻: 王一梅, 楊昊, 張越紅, 李娟(主攻+接應), 孫小清, 楚金鈴 (接應+主攻, 但一傳差D幾麻煩)
二傳: 溤坤, 魏秋月, 韓旭 (而家幾乎係一個冇得出場既冷板櫈, 咁耐大賽都未出個場)
副攻: 趙蕊蕊, 薛明, 馬蘊雯, 徐雲麗 (而家真係唔掂, 成日烏啄啄, 全隊失分之首, 開波又成日出界)
接應: 周蘇紅, 劉亞男 (接應+ 副攻), 白雲 (一個失意但係聯賽打得幾好既一個接應)
自由人: 張娜 , 張嫻

呢個陣容正呀. 打歐/南美球隊可以用
主攻: 王一梅, 楊昊 (張越紅)
副攻: 趙蕊蕊, 薛明
接應: 周蘇紅 (劉亞男)
二傳: 溤坤
自由人: 張娜

打亞洲球隊或者弱雞球隊可以用
主攻: 王一梅(楊昊), 李娟
副攻: 薛明, 馬蘊雯
接應: 劉亞男
二傳: 魏秋月
自由人: 張娜

唔駛打極都係個七個人, 個個都可以抖下. 奧運完左仲有五個人可以繼續留隊, 順利過渡, 幾好呀 :P

雖然中國國家隊今年輸左咁多場波, 但中國青年女排係世界青年女排錦標賽都拎到第二 (輸左俾巴西), 少年女排係今朝更加係世界少年女排錦標賽打敗土耳其, 拎到第一添. 個自由人仲成為成個錦標賽既MVP (好似係第一次由自由人拎MVP). 所以中國後備力量都幾強架.

好似做人一樣, 失敗唔緊要, 最緊要從中汲取教訓, 唔好輸得咁難睇, 都會受到他人既尊重 :)

排球

在中一的時候, 體育堂就要學打排球. 漸漸就愛上了這項運動. 以前幾乎每日放學都打波, 禮拜六又返學校打波. 就算會考之前都繼續打. 這項運動給了我很多美好的回憶. 因為這項運動令我

• 我認識了一大班好朋友.
• 我第一次拿到校際的奬牌
• 我第一次拿到班際的錦旗
• 我第一次體育科拎好高分 :p
• 我跳得越o黎越高, 同埋由全班第二最矮變到十幾最矮. 哈哈.

等等

當然這項運動都帶給我好多悲痛的回憶.

• 我身上邊好多傷都係以前打波引致. 試過一次因為趕住救波, 成個人俾駁住欄杆條線cu 住條頸, 成個人fling 起, 再fling 番落地 (頭向下喎), 搞到嘴上面有條疤 (而家唔明顯啦)
• 我第一次俾人打 (當時係做球証)
• 輸波個種傷感等等.

因為家人都喜愛這種運動, 打從中二的時候, 所有中國女排的比賽, 除非不是無線亞線播, 幾乎全部錄低晒. 有時拎番出o黎睇都幾過癮. 過澳洲讀書之後好少打波了, 因很難找到十一個志同道合既人一齊打波. 球感都生疏了. 係兩年前曾經去過屋企樓下會所同一班唔識既人打波, 感覺是有, 但因為冇打好耐, 直情可以用"核突"來形容自己的技術. 人仍都沒有以前跳得那麽高. 話雖如此, 我對這種運動都有種很親切的感覺. 而家所有室內排球的電子遊戲我都有買. 而家期待十月ps2 出的那隻 world cup volleyball game :D

禮拜日

而家禮拜日唔駛返學, 好似多左好多時間. 雖然曾經想過朝早都係要讀日文, 但都係等埋考試成績出左先算, 始終有d擔心.

咁晨咁早起左身之後有咩做呢? 發覺都幾多架喎. 出去食下早餐, 抺下屋, 打下機. 唔經唔覺就唔見左一個朝早. 晏晝就懶到坐係梳化睇電視, 當係休息. 感覺都幾好. 又諗下煮唔煮飯. 嘻嘻, 但都係好懶冇煮到. 好快唔經唔覺就冇左成個禮拜日. 夜晚上下網, 睇下新閒, 週圍目及目及, 哈哈, 都幾過癮. 死. 一d 日文都冇睇, 算啦, 遲d先算. 嘻嘻.

其他人可能覺得好悶, 但我覺得好舒服, 好自在. 始終我係一個鍾意留係屋企既人 :p

男主內, 女主外

老細係上個禮拜終於"公怖"左佢o黎緊放兩個月幾假既安排. 好好彩, 雖然之前好多人係咁估
我要做晒佢D野, 我呢個係佢眼中好麻煩既人結果唔駛做晒所有野.

我會負責內部所有文件既簽署, 包括所有team heads 放假既批核 (其實都唔駛做, 因佢都已經問左所有人放假既安排, 所似我都只係一個圖章)同埋係每個月一份比較大型既報告裏面寫summary & comment. 另外一個同事就負責對外開會, 一樣我最唔想做既野. 但呢位同事十一月會結婚, 佢問我可唔可以頂佢. 我好衰, 冇直接答應佢, 話到時至算. 況且仲有兩位同職位既同事係度. 可以叫佢地幫下手. 要做既野唔算煩, 怕就係怕在到時個個麻煩秘書又會係咁煩我.

公怖之後我就俾人笑, 話男主內, 女主外. 我就非常滿意咁既安排. 雖然有d人諗咁咪少接觸大老闆既機會. 老實講, 我唔計較. 我已經係退休心態, 開開心心返工好過成日要駁出位. 我唔鍾意應酬同討好老細. 有時間我唔好玩下WII, 游下水, 讀下日文, 煮下飯, 做下家務. 我都係鍾意做"男主內" 既工作. 但我唔會學呀肥龜咁話鍾意食軟林林既飯 :P

屋企做運動

今日禮拜日, 因為日文已經讀完, 所以朝早都好得閒.

本來咁好天應該都落去游水, 但前兩日都用左好多力, 隻小腿仲未好番晒, 所以決定係屋企休息. 但係休息得o黎又唔想就咁坐係度. 結果就開左部wii , 玩下wii sports, mario bros 同 gundam. wii 真係一個幾偉大既發明, 佢可以俾你係屋企做運動. 玩左幾盤網球 (變左pro loo), 保齢球 (終於打到二百幾分, 係真就好咯 :p ), mari bros 裏面幾個mini games (個人都要郁架), 發覺隻手都攰攰地. "休息" 又要行埋一邊loo

遲d wii 出埋wii fit, 到時真係日日夜夜都可以做運動 :p

學游水

其實自己都算係識游水. 點解用"其實都算"? 因為游咁耐都係識游蛙式. 唔識自由式. 以前中學有教, 但當時得幾堂, 同埋個陣跟本唔識游水, 所以乜都唔記得.

今年趁放夏令時間, 搵左個教練每個禮拜五教游自由式. 平時冇咁多人, 所以都學得幾舒服. 但蛙式同自由式實在太唔多. 有好多唔慣既地方. 一係就係唔記得隻腳, 跟住就唔記得手. 個教練幾好, 堂堂教少少, 又俾我好多練習, 仲執得好仔細. 而家靠浮版都算游到少少.

尋日學一隻手放係浮板到, 一隻手要游. 因為靠晒隻左手支撐同隻腳踢水, 游得幾次, 我隻左手幾乎癱咁滯. 隻小腿就有少少老抽. 今日仲有少少痛. 不過始終要練多D, 好希望係呢個"暑假"學識自由式.

哈利波特終於完結

大約六年前, 一個聖誕既前夕, 去了東涌睇哈利波特第一集既電影 Harry Potter and the philosopher's stone. 睇完套戲覺得個故仔幾得意, 就開始睇第二集本書: Harry Potter and the Chamber of secret. 呢本係我咁多集中覺得最悶個本. 後來都繼續睇埋落去

Harry Potter and the Prisoner of Azkaban
Harry Potter and the Goblet of Fire
Harry Porter and the Order of the Phoenix
Harry Porter and the Half-Blood Prince

睇上一本個陣有D唔係咁開心, 因為其中一個重要角式係最後都係死左. 當最後呢本 Harry Potter and the Deadly Hallows 出之前, 作者已經講左有兩個重要角式會死. 好多人包括我都好緊張, 個個會估下究竟harry, ron 同 hermione 會唔會死呢.

答案係尋日終於揭盅. 我去商務拎書個陣, 見到有d人係度拎住本書, 係度目及最後個幾頁. 我就一定唔會咁做, 因為咁做不如唔好睇啦. 不過就算俾佢地目及到, 佢地都會miss左好多解釋.

花左日半睇本書, 終於睇完. 本書既結局我唔係度講啦. 因為有d人應該仲未睇. 但真係好精采. 書中有幾場真係好刺激. 睇到我真係可似用血脈沸騰o黎形容. 又有幾場真係都幾感動. 未睇呢本之前覺得第四本最好睇, 但睇完呢本覺得呢本係最精采. 結局都冇令人失望. 值得一讚.

2007 書展

一年一度既書展又到啦. 我當然唔會執輸, 去聞聞D書味 :P 今年同舊年唔同啦, 得番我一個人去. 其實都幾孤單. 冇得買完可以傾下計. 不過算啦. 當專心睇書囉.

本來下晝一點前入場既話可似用十蚊買飛. 為免多人, 我今早游完水之後就決定係OK買定入場卷. 這個決定沒有做錯, 去到會場, 買左飛既可以直入. 冇買飛既仲要排一大段路先去到售票處.

由於會展擴建, 入面都幾混亂下. 入到場都要經好多個蛇餅先去定第一個場館. 嘩....好多呀. 個個可能貪朝早飛平, 所似一早就去左書展. 我又要用去旺角行街既方法....望上面.. 唔係多人係我前面行O黎行去我會暈暈地. 每間書店都要迫入去. 見到好多書, 好開心. 商務成了今年大嬴家, 佢地既鋪位係入場第一間. 好多人.

我剩係係呢個場館都行左差唔多三個鐘, 行下, 睇下, 時間好快過. 第一本買既書係一本旅遊書. 跟住發覺冇乜野好買. 行左好耐先見到偽科學證據第二册. 當然係有折頭先買啦. 有D鋪頭冇折, 鬼有人買咩. 跟住係個度食左個下午茶. 今年安排餐食既地方都算過得去. 差唔多周圍都係.

跟住又係繼續行呀行呀. 見到好多妹妹仔成日目及住個D 明星出既書. 見佢地好開心咁打開睇, 跟住就吱吱jum jum. 好一班追星族.

走之前幫呀肥支達買左本書. 呢本係第三本書. 今年係咁多年裏面買得最少書既一年. 我本來想好似舊年咁買多幾本 agatha christie 既小說, 同埋買日文耹聽試既練習, 今年竟然一間鋪都冇得賣. 有幾本新書就週圍都見, 例如 historican (好多人介紹, 但睇落好似麻麻), the kite runner 中文版 (舊年買左), for one more day 中文/英文版等等 (肥支達有, 又唔駛買)

行左五個鐘之後, 隻腳仔軟晒. 總結今次收穫唔算太豐富. 可能要我好好清埋之前一兩年買既書先好買新書 :)

考試好好玩咩?

今日同同事食飯, 佢地講開考試. 話有個舊同事讀緊mba, 又考cfa, frm 等等. 心諗好好玩咩? 同一時間考咁多唔係興趣班既野, 唔覺得壓力好大架咩?

呢兩年我都係成日要考試. 好彩日文同普通話係興趣班, 唔駛點讀. 就算讀都唔覺悶同有壓力. 只係個cfa 考試比較辛苦d. 希望今次可以順利通過啦.

其實我由細到大, 考試真係未停過. 都係時間停下, 好好享受下興趣班, 或者其他既樂趣啦, 例如打機, 睇碟, 運動等等......

個個都好冇記性.

自己越o黎越老, 記性就越o黎越差. 最近發覺身邊的人記性還差過我. 相隔很短時間的事都不記得. 可能我專記鎖碎野, 個腦剩係記埋呢d野.其他人就冇我咁無聊囉.

我好鍾意記埋D開心同唔開心既事情. 開心既細節會記得多D, 所似有時想做番同樣事情, 等自己又開心. 但這想法其實好士鵰拔, 因為其他事情 (如人事, 環境等等)都變了, 只有我停留在那段空間. 有時都叫自己好醒啦..

我諗大家都要帶定本拍子簿出街. 寫d見過講過感受過既野啦. 未住. 呢個咪就係我寫呢個blog既原因囉. 大劑, 又唔記得.

今年夏天特別辛苦

今晚睇新聞, 講今年既夏天, 朝早平均既溫度有成廿八度以上, 係咁多年最高既一年. 仲講係呢個世紀中期什至更早些, 香港就會冇冬天啦.

以前香港既冬天真係好凍, 要穿好多大褸, 而家有時穿短袖都得. 夏天因為香港太潮濕既關係. 真係好辛苦. 今朝六點幾起身個陣關掉冷氣開風扇, 但七點許就熱醒, 仲發覺成身黐立立, 死未.

我唔鍾意星馬既天氣, 但我更加唔鍾意而家香港既夏天, 熱得好辛苦. 家家戶戶都開冷氣, 令到條街更加熱. 夏天要我出銅鑼灣旺角, 除非有東西要買, 否則一定說不. 又熱又多人. 唔迫死都熱死. 現在晨早返工, 回到公司都已經好濕. 已經是行有蓋遮的地方. 死未? 晏晝如果沒有太大需要, 我寧可留在公司食飯盒. 帶飯始終是我的首選. :)

夏天唯有的好處就是可以游水曬太陽. 其他好處都想不到. 用電又多, 買汽水的錢又要用多......

睇完哈利仔

尋晚終於睇左啦......yeah.

個場係now 搞既特別場, 因為大部份都係free seating, 好多人都早左去排隊. 我都係, 和同事在六點四十五分左右已經到達, 但已經有一條龍仔. 今次係去皇室堡睇, 裝修左之後既感覺係.....亂. 係一邊買完熱狗, 要行到另一邊 (唔係隔離喎) 拎茄汁, 芥末等, 都幾麻煩. 未開場之前條隊排得好長. 後來發現兩間戲院做. 我睇個間算係大院, 不過d位唔好坐, 又窄. 好彩冇我朋友講有"室".

我地都算排得前, 所以都拎左個幾好既位置. 開場啦, 冇乜廣告, 即刻就做啦. 因為我係兩年前睇過本書, 所以有些情節忘記左, 唔緊要, 當睇戲.

由於部書係暫時咁多本最長既一本, 好多細節都冇交待得好清楚. 例如呢個特別組識點解會俾人知道佢地既行踪, 佢地點樣靠一件道具逃避個位看更呀叔去偷偷練習等等. 但總體上都算合格. 臨尾場大戰都算精采. 但去imax 睇都係得個十幾廿分鐘特別效果, 咁貴戲飛, 唔抵. 套戲裏面個個主角都變得牛高馬大, 哈利仔係最細粒個位(但都有五呎七吋).

仲有十日左右第七集, 即最後個集小說就出版啦. 好緊張. 買完即刻要睇埋個故仔點發展落去.

是我食古不化嗎?

和老細的爭抝越o黎越多. 呢輪差唔多一日一次. 我以前從未試過這樣.

我老細的優點係識得點照顧佢個老闆同埋保護自己（即係識推ｊｏｂｓ）. 我同佢合作了五年, 深深領會呢一點. 以前我地上面有一至兩個老闆係度, 佢就冇得照佢意思去做. 其實當時我已經和她很多次意見不同.　而家變得越ｏ黎越多，　開會係好多人面前同佢拗都試過好多次．　其他ｔｅａｍ　ｈｅａｄｓ個個好聽佢話，　唔會出聲．　佢好多時問大家意見，　我地講左自己意見後，　佢會話老細要．　好啦，　即係乜都唔駛講，大家可以收聲，　乖乖返去照佢意思去做．

最近經典例子. 我地而家已經要寫一個週記俾大老闆個助手, 好使她可以定期更新大老闆最近發生什麼事. 佢上個禮拜同我講我地要另外寫一個update 俾大老闆. 原因係我地出, 我地會拎到credit, 大老闆知道我地做緊乜. 我話咁都唔駛出兩份update. 一係就我地直接出呢份週記俾大老闆, copy 佢個助手好了. 佢跟住話老闆唔會睇d regular野．所以都係要另外出．跟住仲勁，佢話我地做野為老闆，生存都係為老闆．真偉大．　我話我同佢諗法唔同．我覺得我做好自己份野，老細覺得可以幫到佢我覺得已經好好．唔駛成日諗住點”照顧”佢．　（我冇講呢句）．

尋日又一例子．　我話我地部門而家分開左兩邊ｏｆｆｉｃｅｓ　（但都係一個部門）．　我地成日唔知對方有乜野人，　我地係咪要諗下點樣加深同對方既認識，　等ｄ細既做野方便些．　佢第一句話佢無呢個問題．我話你坐到咁高梗係唔駛搵佢地下面ｄ人啦．　佢話呢ｄ野留番俾ｔｅａｍ　ｈｅａｄ自己搞掂．　我話呢個係大圍問題喎，　佢話其他ｔｅａｍ　冇同佢講過．　佢覺得冇問題．反問我有乜提議．　我話我而家唯有可以做到既就係自己同個邊搞飯局，　等對方認識下．　跟住佢就話搞飯局好易嗟，　拎ｄ錢出ｏ黎咪得囉．　晒氣．　心諗，　首先佢跟本冇心做，　第二部問搞ｄ　ｆｕｎｃｔｉｏｎ，呢班老闆全部都唔出席．都唔知當唔當自己仲係一個部門．　

我問佢部門既發展路向，　會唔會分開兩邊，　或者會合埋一齊．佢話冇問題．我話大家始終係一個部門，　成日分開兩邊對班細既都唔係咁好．　而家佢地做既就係你理你，　我理我．仲係唔係一個部門都成疑問．有ｄ　ａｄｍｉｎ又要分開兩邊個．佢話就算分開左都會係咁．　但我覺得名義上分開左感覺會唔同．　起碼班細既唔會覺得古古怪怪．　之前係有同事同我反映過．　我同呢位呀姐講，　佢就話邊個講，　等佢自己同佢解釋下，　我話我唔會同佢講邊個．　我知佢諗緊係我一個人作出ｏ黎．　話之佢．我只係想帶出個問題出ｏ黎，等佢地可以諗下．　跟住又係問我可以點解決．　大姐．　樣樣野我都幫你諗埋，　你仲係我老細咩？　都ｃｍｇ．又話今日唔知聽日事，　唔到佢控制．　咁講乜都唔駛講ｌｏｏ，　即係我地睇野要短線，　唔好諗咁長遠．衰ｄ講句，　最好唔好煩佢．

今朝開部門大會，　到時又會傾呢個問題，　我希望我可以忍得住火．好心ｄ老闆唔好剩係諗自己，　諗下班細既好唔好．

哈你波特

最近好好彩, 係now到中左兩張哈你波特既戲飛. 誰不知發覺身邊人多數唔睇呢套片. 到呢一刻都未有人肯同我去睇.

其實呢個故仔幾得意. 我開始個陣都係睇戲先, 跟住就買小說o黎睇. 唔可以話我著了迷, 但個故仔真係幾吸引, 所以跟住幾年都繼續追落去.

發覺呢本小說最初真係啱細路仔睇, 英文比較淺, 本書又唔係好厚. 但一出落去, d英文就開始複雜, 本書仲越o黎越似本字典咁厚. 但對我都冇乜分別. 因為你追開一個故仔, 無論如何都會追落去. 睇第五本個陣最跨張, 買左返屋企唔夠三日睇完. 好有以前追金庸小說既味道.

第七本都o黎緊. 希望有個好既結局.

[PS. 終於搵到個好友同我睇 :) 佢老公啱啱聽晚唔得閒 ]

夏令時間

呢三年都冇乜放過長假. 但每年九月底之前要清假. 所以通常七至九月會係我既夏令時間. 每個星期返四日.

上個禮拜五係第一日既夏令時間. 朝早起身讀下日文, 跟住去學游水. 學一個鐘, 自己曬太陽加上自己游番一個鐘. 成個池都冇乜人. 直情係爽. 原來一期更衣室D花晒換過晒. 同二期一樣, 都幾好.

晏晝就係打機加睇HEROES 時間. 唔係日本個套喎. 係之前個套類似X-MAN個套喎.

夜晚約了一大班好友飲野食飯. 一個朋友叫我放D, 要準情飲先開心, 我問佢飲得咁辛苦為乜. 嘔到九彩個陣就唔方唔開心. 結果佢..........................................lum 左. 聽日要寸下佢先. 自已知道自己既底線去到邊. 後來發覺個胃有d反應. 我諗以後要繼續減少飲啤酒既數量.

就咁過左第一個夏令時間既禮拜五. 好充實. 要好好享受下o黎梗個d禮拜五 :p

要同戰友說再見了

有位同我做左差唔多四年既同事遞了一封大信封. 我地好多時都意見不合. 但唔會爭吵. 我仍為左佢同我老細爭論一番. 說真, 他的人工是比市場偏低. 用了兩年時間先搞到他升到而家個位置. 但都覺得對他不公平, 所以不嬲會用其他野氹他 (例如去seminar 會俾佢去先等等).

雖然都知道這樣下去, 他遲早會走, 都有為他找尋其他合適的工種. 但事與願違, 其他公司出得起錢, 工種也有少許不同. 本來應該替他高興, 但當知道他會去那間公司. 我不其然替他擔心. 那一間公司的人是行內出名走得快, 內部非常混亂的. 我同我隔離那位咸濕同事, 尋晚同佢傾左差唔多四個鐘, 目的都係想留低. 唔想佢後悔. 但佢始終係想試新野, 冇計.

我老細就奉旨唔留人. 只係好快問我同事點解走, 跟住就話唔會阻人發達. 你可想而知我個部門流失率點解會有成五十巴仙. 我老細只係識點應酬老闆, 唔會點諗下下面d人既前途. 話雖如此, 佢係做左d值得讚既野(搞培訓, 換電腦等). 但一d比較緊要既野佢唔會點理. 同一個部門, 但唔同office既問題佢唔會理, 因為佢覺得唔關佢事.

我之前問過佢, 作為老闆, 覺得我應該點様發展. 佢話應該我自己諗. 大姐, 少少提議都有卦. 你係我老闆, 我既development plan 應該係你幫手一齊決定架. 不過當你諗番佢既性格之後, 我就冇咁失望. 因為佢本身都係一個保護自己保得好緊要既一個人.

聖施禮華慶典

上個禮拜二去左大堂唱歌. 個日熱到呢. 聖堂晏晝個陣又冇開冷氣. 直情變做水人. 慶幸都有風扇頂住.

個日由三點幾練歌至彌撒完左差唔多五個幾六個鐘. 完左幾乎冇氣講野. 個日唱歌都唔算太好. 我隔離個位哥哥仔又冇練歌, 聲音又熊亮. 我有一段時間要"um"住一邊既耳仔唱, 唔想俾佢影響到. 加上得四丁男仔, 最後男聲既效果當然唔算太好. 有很多要改善既地方.

大堂既音響不嬲麻麻. 神父講道個陣 (英文環節) 直情唔知佢講乜. 加上當時比較納悶既天氣. 差少少訓了. 中文環節講道個陣比較好d.

雖然唔算太順利, 但都係一個幾好既經歷.

鮮什果忌廉蛋糕

由細到大都鍾意食鮮什果忌廉蛋糕. 尤其係忌廉, 諗起都流口水.

尋日放左學行過大班, 見到一個半磅既鮮什果忌廉蛋糕, 諗左一陣 (我買野係要諗下後果先, 都算幾煩), 結果乖乖入去俾錢買左 :p

尋日已經食左一半. 真係好好味. 好多忌廉, 好多生菓...正呀.

拉丁文

今個禮拜二, 我地歌詠團又要出去服務啦. 今次係同主業會一齊服務係大堂舉行既聖施禮華慶典. 今次又o黎一次突破 - 要唱中文歌, 英文歌同埋......拉丁文歌.

唔識拉丁文, 所以只有聽mp3聽讀音. 都幾難, 例如 et iie sum (即 jesus), 讀做 "yet soom". 仲有要睇拉丁文樂譜. 拉丁文樂譜得四條線. 每個音唔係用豆豉 (即一劃一點個d)表示, 而係一粒粒豆點表示. 都幾難睇. 我地團總共要唱兩首拉丁文歌. 練左幾次, 暫時都過得去. 但d音樂真係好易令人訓覺. 領主詠個陣, 有一首係由主業會唱既ave maria (莫扎特作曲既). soprano 唱得真係好好聽.

今次tenor 又係得我同我地既團長兩丁. 呀peter哥太勤力啦, 死都唔肯走佢既韓文堂. 不過到時都有指揮幫手 (佢本身係bass, 但都會幫手唱tenor). 好笑既係我地既指揮frankie話我地兩把聲好夠聲. 所以唔駛太多tenor. (言下之意即係覺得我地好嘈, 最好細聲番少少 :p. 嘻嘻, 收到)

打麻雀

因為考CFA既關係, 好耐冇打麻雀啦. 尋日終於過手癮.

朝早游完水後, 就拿拿臨返屋企開定檯, 開定冷氣, 準備開戰. 朋友們一來到, 二話不說, 埋位開檯. 他們而家唔會打廣東牌啦, 所以佢地好耐之前上我屋企, 送左我一副台灣牌. 以備第日開局之用.

台灣牌比廣東牌複雜, 有很多例 (例如拎牌冇花或補完花要叫"請", 食糊自模隻牌唔可以拍埋自己副牌到等等), 食糊數番變化又多 (乜鬼二兄弟, 三姊妹, 四暗刻, 十六不搭, 力咕力咕.....). 我冇學計番呢家野, 次次由我朋友數. 我剩係識食糊就得啦. 講台灣牌不得不說拉莊. 呢樣野可以令你好快冇晒籌碼. 咩叫拉莊? 例如我出沖俾呀A, 要十蚊. 呢十蚊唔係即刻俾呀A, 係放埋一邊. 第二鋪如果又係我出沖俾呀A (或者呀A 自摸), 之前既十蚊要加多五十巴仙. 即第二鋪過後, 總共放埋一邊既數目係十五蚊加第二鋪食糊既錢. 如此類推. 隨時幾鋪就冇晒幾舊水. 不過如果第二鋪呀A 出沖俾你(或者你自己自摸), 你只係俾番五十巴仙(即五蚊)呀A.

尋日如果唔計食晏, 足足四個半鐘, 打左十二圈 [我地不嬲打得好快. 打得慢既好少會入到我地既圈子 :P], 一路打, 一路講下呢樣, 講下個樣. 都幾過癮. 我地唔係打得好大 (五蚊底, 一蚊番). 如果某一家輸得慘重 (試過有個同事係我屋企輸左八舊水, 仲要係廣東牌打到八番個種咋喎. 可想而知個日佢係幾黑仔), 我地之後係會請番佢食飯. 我地唔係賭身家嘛.

經過十二圈大戰, 我嬴左四十五蚊 v^<>^v 拎左去街知巷聞買左十二粒糯米糍請班街坊係打完邊爐一齊分享. 個個食得都好開心 :)

已經計劃七月尾左右又o黎一場大戰, 不過唔同既朋友組合 :p

重執鑊鏟

好耐冇煮過飯啦. 最近趁考完試有些時間就開始我既煑飯旅程. 呢幾日煮左兩樣野, 一樣係忌廉雞柳燴意粉, 另一樣係濕炒牛河. 兩様都幾好味. :p 我仲pack 埋飯帶返公司食. 又慳錢, 又好味, 又有益...呵呵呵 一舉幾得.

之後都會煮番多d飯. 而家諗緊煮炒飯啦, 支翼啦, 炸菜蒸牛肉等等等.

我幾時開始識煮飯? 其實中學個陣都有帶飯, 個陣就識煮d好簡單既菜. 後o黎去澳洲讀書一個人住咪學識點煮飯囉. 個陣係用大湯碗吔飯, 裏面放好多支翼呀, 炒蛋. 我諗當時食野既分量係而家既1.5倍. 但唔知點解個陣咁鬼瘦 [唔夠一百磅 :p]

其實煮餐飯唔駛好多時間, 不過要睇心情. 尋晚炒牛河. 由係屋企出去買餸到食完洗碗都係75分鐘.

綜合收益表

最近都好多消費, 又wii啦, 又router啦, 又homeplug等等. 發覺自己都駛得幾多錢. 平時我好慳家架. 結果的起心肝做張綜合收益表, 列出收入支出. 睇下自己係邊方面用得幾多錢. 其實幾好玩, 將支出劃分幾個項目.

- Income
- cash outgo
- visa outgo
- octopus outgo
- acomodation related
- saving & investment
- provision

每項仲有好多細項. Provision都set 埋, 係咪好好玩呢. 諗住遲d用銀行d statement做reconciliation 添. 哈哈哈...好好玩呀 :p

自細鍾意做會計. 所以好鍾意整呢d野. 但因唔鍾意讀法律, 所以最後大學冇主修呢科. 不過而家工作上都要做類似既野. 整呢d表對我o黎講好好玩 , 好有滿足感 :p

大款佢地見到我咁講一定嘔血 :p

超麻煩秘書

呢輪俾呢條麻煩秘書搞到好煩. 詳情唔係度寫啦, 總之就係我老闆好痴孖筋咁同呢位呀姐講出年唔駛要佢啦. 跟住個幾日, 全公司既秘書差唔多已經知道晒, 因為.......係佢自己周圍八俾人聽. 要人同情佢, 可憐佢. 佢成日話自己無助, 唔知點解D人會咁對佢. 大佬, 成公司大部份人都唔鍾意佢, 做左十年都唔知自己問題係邊. 該煨.

而家佢去到求其他老闆收留佢既地步. 呢D老闆話佢駛唔駛搞成咁呀. 好似乜尊嚴都冇晒. 佢唔駛供樓, 唔駛養屋企, 老公收入穏定, 有宿舍住. D秘書小姐知道後, 只係冷笑話"早知結果, 何必當初".

佢呢幾日話冇必情做野, 但就係度成日打電話俾其他人"訴苦". 再係咁冇人可以幫到佢.

好心你醒下啦!!!!

無線世界

買左WII返O黎之後, 幾乎日日都係屋企搞個NETWORK, 又要搞NOW個解碼器, 又要搞WII上網, 仲要搞無線上網.

搞左幾日終於搞掂上網 (電腦同WII). 銀羔, 湯馬斯崎同企企都介紹左一隻幾好既ADAPTOR - HOMEPLUE, 只要插係插頭就可以傳訊息. 真係好鬼快同方便. 科技萬歲.

聽晚個師傳上O黎搞埋部NOW就大功告城. 申請左體育台....到時有得睇排球啦....好野.....

wii 的世界

禮拜日晚開始, 我終於進入了wii的世界.

一如以往, 我都係諗左好耐時間, 格左好多次價先決定買. 今次就隔左又係半年. 咁考完試, 公司最近又派上x年服務金 (一千蚊左右啦), 又好耐冇送個野俾自己 (對上一次算係換nds lite啦, 即舊年). 最後去左灣仔188 行左幾轉, 格多幾次價, 計計數之後就決定入貨. 買入價$2260, 包括主機, 多一set手掣同火牛. 都幾抵. 仲屈左個老闆以五十蚊既價錢買first step to wii既碟同優惠價買入兩個保護套. 本來想買埋個controller 加5000 wii 分, 但呀哥哥仔叫我整好部機, 上到網睇下先再決定. 話到時返去搵佢買既話都可以平. 開心.

個晚買左返屋企, 放低走左去游水. 個個朋友都覺得怪, 因為通常都會即刻玩. 講真, 我鍾意真既運動多個打機. 個晚考完試想放鬆下, 又咁熱, 梗係去游水啦. 最後幾時砌部機, 係今朝. 今朝五點幾就醒左, 又訓唔番, 咪起身砌下部機囉. 幾過癮. 又發覺我之前買個支nds wifi connector 手指可以用係wii. 開心. 唔駛搞router. 今晚試下先.

而家好鬼熱打唔到真網球, 但可以叫呀老友達上o黎打一打cyber 網球都幾好. 不過, 都係個句. 我好鍾意運動架..冇咁焗既話我寧願落去打波.

ps. 死. 日文功課未做. 大劑. 今日晏晝係公司讀下書, 做下功課啦要.

越O黎越怕我老闆

今日真係好嬲. 本來想寫今日點解俾老闆激親, 但諗下諗下都係唔寫. 唔係我怕左佢, 係寫佢呢D人真冇謂.

只係想講一個就快做第二任媽媽既女人, 只係鍾意一D 啱佢駛既人. 唔啱駛既人就當眼中釘. 又勁保護自己. 成日搞小動作好.悶.

算. 飲啖水. GU 一聲吞左去.

大戰終於完結

經過六個鐘頭大戰, 終於可以抖一抖.

今日考試都幾多趣事.
1. 你見過機場快線迫爆人未? 今日係第一次, D遊客都上唔到車. 係機場個陣, 佢地用左好多時間先落到車. 我就好好彩, 去到返都有位坐 :P

2. 我第一次緊張得滯撕爛份卷. 話說晏晝個份係選擇題, 最初要係本問題簿撕下電腦答題紙. 我唔唯意張答題紙係細個後面個張紙少少. 一次過將兩張紙一齊撕落O黎. 跟住點? 梗係舉手要求換簿啦. 容乜易話我撕走一頁拎走架. 當時好瘀皮.

3. 考試前唔夠五分鐘女厠仲係大排長籠. 其實摶覽館已經好多廁所. 唔知點解D女士係要入到試場先去.

4. 晏晝吔飯個陣我地放先 (因我呢份卷比較少人), 我就拿拿臨去飯堂拎野食. (之前訂落既), 跟住唔夠十分鐘其他卷既人散啦, 開始好多人去到飯堂, 仲要打蛇餅. 我最怕見到咁多人. 梗係快快手吔完雞咁腳走人. 上番試場出面見到又成村人坐晒係度讀書. 救命呀, 唔好咁多人得唔得? 我見到多人會暈架. 結果搭正一點我就好快入番試場. 晏晝份卷係兩點鐘開始. 結果我就係入面坐左四個鐘.

5. 考試去灣仔買WII 啦, 格左幾間, 最後就去左一樓一間鋪頭買啦. 突然我隔離閃左個男仔出O黎買PS3. 咦, 咁熟口臉既. 我記得啦. 佢又係同我一齊考試既其中一位. 真巧合. 唔通個個都係等到考完試就打機?

第一關終於告一段落. 開始好多野要做番啦. 尤其日文D功課同PRESENTATION. 下個禮拜就係啦...仲要練教會D歌...跟住公司要做PRESENTATION, 下個月就係第二關 - 日文會話考試同筆試. 仲有要開始搵番D朋友食飯啦. 唔係各各都以為我瓜左 :P

仲有一個禮拜就沖厠啦

今年直至七月為止要準備過兩關. 下個禮拜就係今年第一個大關.

呢輪既生活多數都係讀書, 讀書再讀書. 冇計. 記憶力衰退, 唔讀會唔記得. 好彩間唔中都有做下運動, 唔係我會悶到瓜左. 到時就要搵人同我收屍.

今朝上左半堂日文就走人返屋企讀書. 呢四日雖然放假但每日好似返工咁都係八小時讀書. 好鬼悶既生活. 機又冇打, 飲又唔煮, 好多好多野都唔願做, 都係等下個禮拜沖厠呀. 我諗我考完試之後一定會1好忙, 因好多未做既野要全部一次過做晒. 仲有就係要準備七月第二個大關.

大力, 努力, 加油. 記住要靠自己. 唔好靠人, 冇人幫到你. (今年年頭種種唔開心事之後同自己立既左右銘....而家拎番出o黎用...好啱駛 :p )

越O黎越唔識同人溝通

而家越O黎越覺得好難同人溝通. 不論公司, 家庭, 什至朋友之間都係.

問題不在於言語既運用, 係唔知道對方諗緊乜. 即然唔知, 我都唔想諗, 寧願自己唔出聲. 你鍾意點諗點做我都唔理. 你可以話我好似逃避緊. 但我唔想去問人地你究竟想點. 問得多好似好八卦, 人地又未必鍾意. 即然咁, 是但啦. 收口最好.

最後都係個句. 冇期望, 冇失望! 大家飲杯.

呢d咩人o黎架?!

今日終於要同呀麻煩秘書123 做一年一度既appraisal. 佢今朝突然同我講要私底下講幾句. 冇辦法啦. 又要應酬佢.

去到會議室. 我就問呀123點解唔等埋佢半個老細小肥豬先傾. 佢話同呀小肥豬唔係好啱, 佢係度既話佢唔會講任何野. 我話咁唔得架喎, 話晒小肥豬係佢半個老細. 佢話總之唔想同佢講.

好啦. 開始啦..佢話以前d老闆俾佢好高分, 點解今次會跌得咁低. 我話你年頭已經升左, 仲係跳級, 而家點可以仲用以前把尺o黎量度. 佢係跟住落o黎個半鐘既對話中, 足足講左五次呢樣野. 我就還以其人之身, 解番六次咁多. 最後個次係大贈送 :p

跟住有好多個points我都唔係度再講, 諗起都煩. 但最後一個point真係要講下. 佢個objective 其中一項就係第日會由其他同事俾分佢(即360度assessments), 因佢係做admin, 所有同事係佢d客, 佢地俾分好正常. 但佢反應幾鬼大, 第一句就話咁人地唔鍾意我俾低分我點算. 我心諗. 個個都唔鍾意你架啦. 真有自知之明. 當然我又要好客套咁講, 唔係剩係一個人俾分你. 除非你得罪晒全部既人, 一兩個人既result點會影響到你. 佢跟住就發晦氣話你地鍾意加咪加囉, 我都冇權話事架啦. 嘩, 火都o黎埋, 咪窒佢做appraisal 係兩方面. 你唔鍾意可以出聲, 冇話一定要加上去. 但我收唔到你有任何原因要反對呢樣野. 跟住佢又扯開話我幫好多人架, 你sample 揀咪唔著數. 我同小肥豬即刻插口. 你都幫咁多人, 咁全部人同你做appraisal都唔過份. 同你冇工作關係個d, 無la la 都唔會幫你填架啦. 佢又收聲. 但又係好不滿意咁既樣. 我又再同佢講. 我之前同你講過你d溝通好有問題, 而家就係一個例子.

跟住佢又轉去第二個話題, 話好想去第二個office做架. 因個度開心d, 唔想係度做. 又問我之前個個位做d乜架. 我就話就算有呢個位, 都唔擔保人地會揀你. 等佢知道佢唔係好多bargaining power. 好心啦, 你自己知自己事, 係我面前扮野. 你未夠班.

次次對親佢都係一個"煩"字. 佢老公真好野, 可以對住佢咁耐.

今日好開心

大力: 今日係禮拜日, 同平時一樣又係返學, 今日好D,識答晒所有問題. 測驗又係一般. 又要怪自己冇乜記性. 晏晝又係好悶咁係大家樂買飯食. 食完又係坐埋書枱到讀書.

A: 喂...咪住. 你個題目明明話今日好開心. 做乜講D野咁悶架? 咪學人地咁一年三百六十五日都係度暗示辛苦啦.

大力: 未講完呀. 大哥. 六點左右本來又要諗去邊到食飯. 突然收到個電話. 一個好耐冇同佢禮拜日晚食飯既朋友打O黎. 聽到佢個電話我好開心. 因為冇預到可以同佢今日可以食夜晚餐飯. 呢位人兄好鬼忙. 好多應酬. 禮拜六日晚都唔駛旨意可以約佢食飯. 對上一次我諗都有成幾個月啦. 同佢成到飯感覺好似抽到奬咁 :p. 最後就約左佢係樓下花園餐廳食 (佢都住係附近). D野食好普通, 但可以接受, 我平時都係食垃圾野架啦. 最開心都係可以同呢位朋友食下飯, 吹下水. 食完飯返到屋企仲食左個甜筒添. 好好味 :D

A: 你呢份人都幾易滿足架喎, 小小野就可以咁開心

大力: 冇辦法啦. 咁樣先可以令到自己開心D嘛.

是我太好人嗎?

今日開大會, 傾部門人仕一年一度既表現. 當講到呀麻煩秘書個陣, 我真係O晒嘴. 我當然會講佢有咩問題, 就係太依賴. 佢不嬲人緣唔好, 每位老細跟住就開始拎出佢地把刀係咁插. 話佢態度差, 唔合作. 呢個問題佢入左O黎十年都係咁. 佢同第二D部門既關係, 尤其人事部就非常之差. 都是因為她的態度問題. 佢做野係好, 但有時太持住自己係部門呀頭既秘書, 周圍要人做野. 而家佢跟我同另一位同事呀甲. 我地都唔係部門呀頭, 但佢都成日點人做野. 上次升佢個陣, 我受既壓力好大. 其實想佢轉型做admin assistant. 老細都係咁諗, 跟住人事部就話不如升多個grade啦, 公平d喎 (有一個相似例子). 好啦, 照做. 跟住我就俾其他秘書小姐 (其他部門既都有) 圍攻. 好彩本人人緣都唔差, 冇俾佢地糟蹋. 但都要識做請佢地食飯.

當同事甲補充個陣, 佢話呢位秘書好睇人. 如果係對我就好好, 因為我同佢做評核. 但對其他人就好差. 剎時個個都係度笑. 救命呀......我想搵窿捐. 跟住我話我贊成同事甲既講法. 因係好明顯. 可能我同佢比較稔熟 (識左十年啦) 我老闆就係因為咁要我成日做中間人. 唔會直接同佢講野. 我就成日要聽埋呢d野. 我覺得佢地真係考我EQ. 佢地話不如咁做啦, 個個又話咁做啦. 大佬, 講就容易, 做就睇下佢地會唔會做. 當話不如叫佢幫提出建議個個人既時候. 佢咪又係即刻縮沙.

而家有個機會. 呢位麻煩秘書成日話自己搵緊路走呀. 想過去幫下老闆乙, 唔想留係度. 講到好似佢好鬼巴閉. 好. 當我知道老闆乙個部門有空位個陣, 我就同佢講, 而家個度有個位, 但未必長期幫老闆乙 (因呢位老闆乙係短暫幫下手既), 問佢過唔過. 呢位麻煩秘書好快就講 "其實我係度同你做野做得好開心架". 好似驚死人即刻調佢走咁. 遲d我會同佢繼續傾. 不過今次我搵埋呀同事甲. (小道消息話呢位麻煩秘書對同事甲都係唔好). 佢成日都想去我地個部門另一個office到幫手. 但個邊幾位老細一早已經拪手拎頭. 大家都知佢d野.

呢位麻煩秘書仲厲害, 成日話自己唔識計數架. 要計數既job唔好俾佢, 一定錯. 態度簡直離乜譜. 個日我己經同佢講唔可以咁既態度喎, 咁樣等如揀job有咩分別. 佢仲係度繼續講 "我唔識架, 我好多野做架" 係咯. 好多野做係因為成日打電話同人講是非呀嘛. 係人都知啦.

我都仲未諗今次點同傾. 諗起都煩. 佢之前幫既兩位老細 (全部走晒loo) 都好鬼怕佢.

好怕長氣一族

以前返教堂好怕去到講道時間, 因為D神父好鬼長氣. 閒閒地都講半小時. 有時會講足四十分鐘. 就算而家, 比較年長的神父,他們講道都很長.

好怕人長氣同婆婆媽媽. 其實講重點咪得囉. 駛唔駛左一忽右一忽, 講咁鬼長JEH. 我公司個麻煩秘書又係長氣一族. 成日重覆同一件事, 我覺得已經係病態. 前幾年去呀達個音樂會. 個個主音大哥長氣到呢 . 成個SHOW兩個鐘頭, 我諗佢起碼講左一個鐘頭野. 唔駛咁多野講呀. 想叫人信主唔係你係咁重覆咁講, 人地就會信架. 可能我不太習慣部份基督教弟兄們他們的講道方法, 試過幾次去朋友基督教的婚禮又係咁樣. 總之我好怕太長氣既人. (啦啦啦, 各位基督教既弟兄姊妹, 我唔係針對你地呀, 唔好誤會呀. 我都去過好多基督教既婚禮. 個牧師講得精而簡架. )

堂區舊年有位修士晉升神父. 他看來年青一點. 我不太認識他. 但很喜歡他講道. 因為精而簡同活一點. 不是呆板那類型. 次次他做主禮都有笑位. 唔係佢唱歌走音, 就係佢講道有爛GAG :P

今晚又係佢做主禮, 笑位係佢講道. 等我重覆一下. 覺得好笑既, 就俾面笑一笑啦.

佢話最近有位好耐冇搵佢既弟兄打電話俾佢, 好愁咁同佢講好唔開心. 個神父咪安慰佢囉, 問佢咩事. 個弟兄話佢好想俾個驚喜俾佢呀媽, 但每次打俾佢爸爸個陣, 都係一個女人聽. 哎.....咁個神父就問你同個個女人有冇講左D乜呀, 個弟兄好低沉咁講佢冇同個女人講乜野. 大劑啦, 家庭問題, 點算好呢. 神父唯有再問佢咁個女人有冇乜野同佢講. 佢話有. 神父咪問佢講咩囉.. 佢冇出聲一陣, 跟住佢話個女人同佢講















"你既電話未能接通, 請你一陣再打過O黎啦" !!!!!

頓時全間教堂都充滿笑聲. 又一次令到大家開開心心. 佢講道通常都係10-15 分鐘. 我覺得啱啱好, 起碼啱我 :)

我忍..忍...忍

我諗我忍手買野既功力真係幾高. 買手提電話可以等足六個月, 買樓就等三年. 就算WII出左半年我都未買. NDS 個隻SUPER ROBOT GAME 都出左兩個月都係未買.

有時, 我都會諗去邊到邊到買呢樣買個樣, 但到頭來可能一件東西都沒有買. 第一次去東京個陣都有諗要買好多好多東西返來香港. 結果係買得個幾盒中古遊戲碟. 可能我要求又唔太高, 想要既野又唔係太多. 所以沒有這種購買慾.

有些人鍾意一見到就買. 我好少有這種衝動. 每一樣東西我都會思前想後, 才決定買唔買. 我會考慮買了之後會唔會後悔, 值唔值, 會唔會放係屋企惹塵搞到將來要花好多時間清潔. 買衫褲鞋襪就好一些, 會快一點, 入到鋪頭見到邊件鍾意, 試上身, OK既就買, 跟住走人. 當然都會諗下駛唔駛買咁多. 最初本來諗住買兩件, 最後會係一件.

這種性格有好有唔好. 好既咪唔會亂買野, 可似儲到錢,將來再慢慢用. 唔好既就係諗得太多. 老友達常常話我諗得太多 (唔只買東西這回事, 其他事情都一樣). 可能卦. 但好彩我既白頭髮冇佢咁多 :P 所以我覺得佢諗得仲多過我...呵呵呵.

其實而家溫書個陣都有諗考完試之後買乜買乜. 到時可能又全部都唔會買 :P

多麽充實的一天

今朝起身就去了堅道總堂, 替一個聖詠團團友親戚既仔結婚唱歌. 大堂既音響設備真係麻麻. 出面領經台就聽唔到琴聲, 裏面收咪既聲好散. 係有驚無險之下 (有一part 唱二部獨唱個陣唱高音左), 終於完成左個服務. 今日神父既講道都係環繞"愛"呢個主題.

跟住拿拿臨飛的去香港仔魚市場, 同班街坊友好滙合, 食餐勁既海鮮餐. 今次係第三次去啦. 但都係好好味. 有士佳搣極都搣唔到既瀨尿蝦, 老友達同小露寶都唔食得既掓鹽魷魚, 好大隻既象拔蚌, 好好味但唔知乜o黎既魚等等. 食完仲有一架24人van仔車我地七男女返屋企. 好爽. 真係又要好似多謝家姐咁多謝大款.

四點零聖詠團班友仔打電話o黎話架車係樓下等緊我. 我就要拿拿臨換衫衝落去. 仲要俾人取笑"首席男歌手", 所以有專車接送. 我就話自已係"坐係第一排既走音男歌手". 返到教堂繼續俾班兄弟姊妹玩番夠本. 好想搵個窿"捐". 今晚練歌都幾好. 練左好多二部既歌. 但後o黎真正唱個陣又唔記得左 :p 都話我無記性架啦. 今日有個老師做分享. 主題都係關於愛.

我地要愛別人, 因為天主先愛了我們. 主祐!

我中左六合彩

以前買六合彩, 一期都冇中過. 差唔多次次都係一個字都唔中. 成日諗點解馬會冇一個奬係俾個d一個字都唔中既人.

前晚同事話六合彩有成七千萬奬金. 諗下是但啦, 又買o黎玩下. 於是打左電話係呀爸, 叫佢幫我買. 佢個電話超細聲, 我要講到好大聲佢先聽到. 跟住就係成部門d人都知我買六合彩...........

個晚十一點就睇下出左d乜數字, 發覺咁熟口面既, 跟住拎張飛出o黎睇.....嘩....我中左呀.............七奬, 得廿蚊雞 :p 都好過冇. 話晒咁大個仔第一次中六合彩. 不過都係我呀爸買既. 佢幸運好多既. 所以諗住俾張飛佢. 等佢拎左個廿蚊再買過...嘻嘻...我好貪心.

我係唔係變態?!

前日放假睇左朱朱俠3, 都幾好睇. 入面奸角都幾鬼多. 不過可能太多, 戲份就比較散. 有一幕呀朱朱俠俾venom捉鬼住, 跟住俾sandman係咁打．　當時睇到好興奮，　諗下佢會唔會死呢（雖然一定唔會），　但諗起都過癮．

以前都幾鍾意睇ｍａｒｖｅｌ 同 dc個邊ｄ漫畫　（例如正義聯盟呀，蝙蝠俠, 綠燈俠, 朱朱俠等等). 以前係澳洲讀書同做野個陣, 成日走去newsagency 睇漫晝, 因為唔駛錢 :p 當時就諗有冇搞錯呀, 次次都係奸既輸, 正義個班就一d都唔會瓜柴架. 好想睇下d正義超人俾人糟質呀既情景. 後來終於"願望成真" - 由超人激戰doomsday 之後, 班友仔逐個開始俾人打到九彩: 蝙蝠俠俾人打到殘廢, 神奇女俠/flash戰死, 綠燈俠變左做奸角. 睇完大快人心. 心諗今次正呀, 你地終於都有今日. 後來當然佢地全部都翻生, 但起碼俾到人一個訊息就係佢地都係普通人.

越大越無記性

仲有一個月就考CFA 啦. 但發覺自己既記性真係越o黎越差. 以前成本書都係咁背入試場考試. 而家讀左唔夠五分鐘就唔記得晒. 之前個兩級係考選擇題. 唔記得全部都唔緊要. 但今次有一張係要寫. 而家唯有係盡量抽時間讀書. 坐車, 朝早係公司, 食晏, 返到屋企全部都係讀書. 希望順順利利考埋呢張就好啦, 以後唔駛再考咯.

其實考唔考CFA 都考慮左好耐. 之前考而家個牌都搞左我七年時間. 呢七年係冇晒自己既生活. 跟住因為工作關係就諗好唔好讀一些investment有關既書. 跟住就諗不如考埋去啦. 但個陣又唔想過以前個種非人既生活, 況且又讀緊日文, 所以掙扎左好耐. 結果都決定報考.

大大力. 努力呀.

下水禮

今日同呀衰仔達打完波之後去左泳池舉行2007年度下水禮. 成身臭汗就淋淋花曬先行出去泳池. 一出更衣室, 經過"噴水池", 花曬D水淋落個身個陣, 感覺係....凍到入心......不經意都打個冷震.

今日陽光好充沛. 諗住暖暖地啦. 點知隻腳點到泳池水就發覺........好凍呀. 跟住唔理三七二十一, 吸一啖氣跳落去游下游. 開頭真係幾鬼凍, 游得一兩個堂就開始冇野啦. 仲覺得好舒服. 游左十幾個堂之後就上水曬曬太陽. 個泳池真係好鬼正, 好似渡假村個D泳池. 聽到D雀仔叫啦. 水聲啦. 大約一個小時左右就離開左.

今年既下水禮都幾好. 應該陸續有O黎....泳池...你等我. YEAH!!!!

九年半啦

今個禮拜五就係我係而家間公司既五週年啦. 計埋以前既四年半, 我係而家間公司都做左9年半loo. 係部門排名第四做得最耐個位...

呢九年幾係間公司學到好多野, 識到好多朋友. 其他人對我都好好..不論老細到茶水呀姐或者派信個位呀姐都對我好好. 算係咁架啦. 回想最初個幾年係公司日日做15-16個鐘, 真係乜生活都俾晒佢. 回想呢段時間, 都覺得係值得. 因為學到好多野, 同埋而家一班好友, 都係個段時間一齊捱. 見佢地真係多過見屋企人. 佢地而家全部都結晒婚, 有晒仔女添. 但我地都感情都依然好好.

下一個10年個陣, 我又會回想咩呢? 唔知loo....到時至算. 而家諗下點用公司五週年送既$1000 奬金好過啦. e...好野. 年假又多兩日 :p

我係一個鄉下人

最近維景科林走左個美湯同大文出o黎搞事. 一個係咁踩隔離個都會eki, 一個就話要捉對方出o黎. 覺得呢兩個人都係痴痴地. 講野都唔經大腦.

今日上完堂返o黎屋企, 出面雖然落雨, 但望下出面, 有山有水有大草地. 感覺真係好舒服. 伸個頭出去, 好彩冇聞到個陣出晒名既垃圾臭味. 呢度d空氣比起市區出面真係清新好多. 人又唔多. 啱晒我呢d去到旺角銅鑼灣要枱高個頭行路既人 (因為我見到咁多人係我前面行o黎行去會頭暈). 呢度真係鄉村同市區既混合體. 夜晚又好寧靜喎. 而家出面一d聲都冇....正呀. 老友達話我應該係澳洲住, 諗落都係, 個邊啱我 :p 不過會悶死囉.

今晚去買飯行經都會商場...多人到呢. 以為去左寶琳新都城. 心諗再係咁我第日都係行番出面, 唔駛見到咁多人. 我始終係一個鄉下人 :p

Perhaps Love

最近要為一個婚禮練歌. 有一首歌真係幾好聽 - Perhaps love. 雖然我冇份唱, 但聽呢首歌真係好有感覺.

PERHAPS LOVE (John Denver)

Perhaps love is like a resting place, a shelter from the storm
It exists to give you comfort, it is there to keep you warm
And in those times of trouble when you are most alone
The memory of love will bring you home

Perhaps love is like a window, perhaps an open door
It invites you to come closer, it wants to show you more
And even if you lose yourself and don't know what to do
The memory of love will see you through

Love to some is like a cloud, to some as strong as steel
For some a way of living, for some a way to feel
And some say love is holding on and some say letting go
And some say love is everything, and some say they don't know

Perhaps love is like the ocean, full of conflict, full of pain
Like a fire when it's cold outside, thunder when it rains
If I should live forever, and all my dreams come true
My memories of love will be of you

Some say love is holding on and some say letting go
Some say love is everything and some say they don't know

Perhaps love is like the mountains, full of conflict, full of change
Like a fire when it's cold outside, thunder when it rains
If I should live forever, and all my dreams come true
My memories of love will be of you

其實愛, 唔單只係男女朋友既愛, 所包含既意義可以好大, 有對父母既愛, 朋友之間既友愛, 對上主既愛, 什至對寵物既寵愛...好多好多. 唱呢首歌個陣, 不坊諗下你身邊既人. 有幾多需要你關心, 但你又冇付出一點愛既. 要留意啦.

愛可以是單方面, 也可以是雙方面. 單方面既愛不一定是痛苦的. 當你知道對方 (乜人都好啦) 很開心的時候, 自己都會非常愉快 :)

葡萄園聖詠團

係一次機縁巧合之下, 我參加左教堂禮拜六既聖詠團. 到今日差唔多都個半月啦. 這個團雖然人數唔多 (尤其男仔, 得蝦餃燒賣同义燒包. 我係邊個. 唔知喎.), 但人少少都幾好. 人同人既關係都幾密切下. 係呢個半用裏面都搞左好多活動, 有靈修既, 有玩既, 有服務既. 好耐冇參加善會啦. 呢個團叫做葡萄園聖詠團.

個晚練完歌去食飯. 有位姊妹問點解會叫葡萄團. 我地已經係度笑. 點之解釋個個仲搞笑. 佢話佢有次上堂個陣問人蒲飛路個"蒲"點寫. 有個人就叫話, 咪"玉蒲團"個"蒲"囉. 佢話未睇過, 唔識寫. 我就笑話唔駛睇都知係乜喎. 結果講下講下, 我地既葡萄團就講到係玉蒲團. 該煨.

衰鼻又發作啦

呢個禮拜成日頭暈暈. 對住部腦望多幾眼就會暈暈地. 出街望到多人又係咁. 係公司做做下野又係咁. 如果我唔即刻咪埋眼, 我諗我真係會係街度暈低. 呢D病徵好明顯又係個鼻作怪. 抖唔到氣, 鼻竇個位又痛, 又係咁咳.

呢個病已經困擾我差唔多十年啦. 由係澳洲做野個陣, 咳足成年之後先搵到呢個問題, 到而家不斷係咁發作. 真係好煩. 睇醫生又唔平喎. 一次五舊水, 配埋D藥水都成兩舊水. 前幾年係咁游水比較好D, 冇咁易發作. 今年個人懶左, 少左游水, 所以天氣一轉, 個人一緊張就O黎啦.


唔得, 我要開始游番多D水......UM...都係遲多一陣先, 等我考埋個試, 之後就游多D. :P

平凡的一個禮拜六

經過三日煩忙的工作天 (禮拜二係我今年既第二次病假 :p), 終於等到今日禮拜六. 朝早如舊同老友達去打波. 今日打到呢.....差到自己都覺得唔好意思. 好似突然唔識打咁. 唔係炒高就係落網. 隻手好似發軟蹄咁, 楂塊拍都冇力. 結果打左個半鐘就好走人. 返到屋企就一如以往, 繼續準備考cfa. 做左幾題past papers既問題...又係做得唔好...要努力. 仲有個半月時間準備咋.

晏晝走去彩明五金鋪幫老友達買野, 嘩, 多人到呢. 唔知係咪裝修, 所以咁多人買野. 等左一陣終於買到. 之後就求其係大家唔快樂到買左個飯盒返屋企吔.

吔完又要溫書, 今次係溫聽朝既測驗. 好想快d七月中, 所有試考晒, 到時可以做好多其他野. 讀讀下頂唔順, 係梳化瞌左一陣. 係個半個鐘裏面, 竟然可以發好多夢, 仲係好緊張添, 好似見到自己係到訓覺. 唔通我個靈魂走左出o黎, 望住自己?做乜鬼咁快返番入去個身到jeh, 出去環遊下世界先嘛. 一訓醒就精神好多. 繼續讀書.

跟住就返教堂練歌...參與彌撒. 今日神父唱歌......但係走音走得好厲害. 唔知佢知唔知呢? 我後面個幾條細路嘈到呢, 最後都忍唔住叫佢地收聲. 呢班細路次次都係度, 之前已經俾人鬧過一次, 但都要繼續係度玩....哎..

今日都算好鬼平凡. 冇乜特別. 仲有幾個鐘就禮拜日啦...開始有d失落. 得番一日假期咋. 聽日又要走o黎走去喎. 咁就冇左個週末啦.....唔際呀.......

上進心?

最近同事告訴我我老闆有左身孕. 她第一時間說我老闆放產假的時候, 我就會做代部門呀頭, 和我另一個老細平排. 我即時話我沒有興趣做這份工作.

雖然計算年資, 我的確是部門裏面第二個最資深的員工. 其他人也是這樣看待我. 但是我不太願意接受這份差遺, 就算我老闆同我正式講我是部門第二把交椅, 我都會說我唔想做. 很多人很想接受這個位, 但為什麼偏偏我不想. 是我沒有上進心嗎? 原因很簡單, 我的性格天生不太適合做領袖. 我只是一個好好的支持者. 以前在hr訓練做的分析都是這個結果. 我不太喜歡和人爭拗, 也不太願出意站出來, 代表部門爭取什麼. 況且這個壓力太大了. 現在工作和其他的壓力已經太大, 身體日漸衰弱. 再加重我的負擔, 我會接受不到. 其次就是我是一個懶人, 我不太想做這麽多.

老實說, 就算公司加我人工, 升我職, 我的答案都是一樣: "我不想做領袖".

我的第一次

今晚終於獻出一生人的第一次 - 在教會領唱. 練歌個陣緊張到發癲. 弟兄姊妹都紛紛替我減壓. 但效果都唔係太好. 其實今日成個下晝係屋企都唱左n咁多次, 係屋企唱冇問題, 但一返到教堂就唔知點算.

當神父拿著十字架進場時, 我望著祭台後面的基督像, 心裏同祂講希望你接受我呢份奉獻. 很奇怪個人平靜了些. 當要唱第一句的時候, 我見到好多人望著我. 我心裏面有些驚, 但我繼續望著那個耶穌像. 人就開始平靜了. 唱都可以接受. 雖然中間曾經甩嘴, 但總體都可以了. 當然可以再唱得好一些.

就這樣給了衪我的第一次 :)

我要多謝一位弟兄(唔記得問佢個名添), 佢俾了少少意見我, 但真的很有用, 就是唱歌的方法. 以後真的要多多練習.

復活節三部曲

對於一個基督徒來說, 復活節是四旬期裏的高峰. 天主教的日曆裏, 這個星期稱之為"聖週". 由聖枝主日開始, 接著星期四晚記念基督建立聖體聖事, 星期五記念基督的苦難, 最後星期六慶祝衪的光榮復活. 一個又一個的高峰, 令自己都會反問自己準備好自己的心靈沒有.

每年這段時間是我最感動的時候. 因為想著耶穌怎樣無私的將自己奉獻自己給一班反對自己的人. 自己可不可以做到這點呢.

今晚參加了記念最後晚餐的禮儀. 一如以往, 唱"皇皇聖體"時自己真的好想喊出來. 我不是作大, 真的有那種感覺. 明天在朝拜十字架時, 我想又會有這種感覺. 現在擔心的就是明天領唱"基督讉責"時唱得不好. 希望到時可以用歌聲當作自己的禱聲奉獻給上主.

我又o黎亂想 :p

都唔知做乜鬼, 今日個胃又漲漲地. 唔通慢性胃炎真係咁慢都未好番..

最近老友達問我做乜呢輪成日懷舊, 我話我可能就c, 所以咪成日懷舊. 呢輪發夢又見番好多以前d人同地方. 今日個胃又咁樣, 加上去墳場拜山, 突然有d感覺我真係唔會係呢個人世好耐. e.....咪有本書, 乜鬼三十幾歲前要做99件事既. 我做左幾多件呢?

我成日覺得最好就係訓訓下就走左. 唔駛有任何痛苦.

又一懷舊之作

又係懷舊既文章.

前兩天在星加坡上堂. 來南洋對上一次已經是十年前的事了. 發覺星加坡都發展得好快, 尤其是由機場去down town 經過的marine parade. 以前是沒有這麽多的鋪頭, 現在就多了很多了. bougis st, raffles place 都變了很多. 對我來說沒有變的就是天氣和雞飯. 前者仍是這麽的悶熱. 不想在這裏工作仍是我的想法. 去到星加坡的第一天已是晚上九時左右, 但為了爭取時間, 落了酒店的餐廳吃了一客雞飯. 沒骨的雞, 多麽香的油飯.....都係一個字...正.

在拜一晚上 (星馬地方的人是不會說星期一, 他們會說拜一) 回了當地公司和那裏的同事打聲招呼. 發覺都變了很多. 那裏的秘書應該可以說是識了十年以上的同事. 但那天她已經走了.

那天晚上和一位朋友在bougist st吃飯, 吹吹海風, 看看星星, 真的很舒服. 不用想這, 不用想那, 很久沒試過這樣悠閒. 一坐就兩個半小時了. 希望將來還有這樣的機會和自己的好友在那裏偷閒 :p

我已經老了, 所以常常想著以前的事 :)

btw: 好搞笑, 在機場幫人填問卷的時候. 那個人說我的英文不像香港人. 那麽我問她我的口音像是什麽人, 她說不出, 不過她話我的口音夾了好多地方的口音. 總之就不似是香港人. e....香港人的口音是怎樣呢? 一個一個字"dang" 出o黎定係最尾個音要拉高? :p

往事只能回味

又想寫少少野.

我這個人喜愛懷舊. 以往開心的片段永遠會記得. 尤其是看回以前的相片會令我更加感慨. 現在漸漸發覺舊有的快樂好難再次重現. 是世界變了, 還是我仍然停留在以前那段空間. 人們常說要向前望, 但點解人唔可以緬懷舊日發生的種種開心事. 但一想到這些快樂的日子不能持續的時候, 那種失落感真的很難接受. 我不是要求什麼, 就當是我的咆哮吧了.

p.s. 這陣子仍然睡得不好. 每天清早起身都很累 :(

收在心中

今日好累, 朝早打波, 晏畫睇戲, 跟住返教會開會練歌望彌撒, 之後又係練歌..........

今日有d感受, 本來想寫出o黎. 諗諗下都係唔寫啦. 收係心裏面好d. 今日開始, 暫時唔寫野住. 有d感覺我想都應該係個心到算啦.

冇野睇啦, 走得.

越想越痴線

今朝又好早醒左, 之後當然係訓唔番. 我已經咁早訓, 但而家都咁眼訓. 可想而知呀邊個咁夜訓, 又咁早起身, 佢咪眼訓到c. 諗起都怕伯

離入院的時間還有數天, 家人最後都知道了, 但我還是沒有和他們說是那一間醫院, 不想他們走來走去. 只是小事一則. 但我好像好快要和這個世界說再見, 又在想捨唔捨得離開呢 :p 如果這一刻離開, 我想我不會有什麼唯撼. 曾經開心過, 傷心過. 有很多朋友, 居住在一處自己很喜歡的地方, 做了很多自己想做的事情, 在這數年也認識了一個好的老友, 我的好兄弟等等等. 工作上也都達到了我的目摽. 還有什麼要求呢. 走了可能會是一件好事.

傻佬, 你估自己真係會瓜柴咩, 諗到咁遠. 返番o黎現實啦唔該...噢...就o黎要開工. 現實真係好殘酷.

無助?

前一陣子我心情壞透了, 有個朋友盡量抽時間陪我, 我好感激他. 到現在我這個朋友常常悶悶不樂, 雖然他說不用擔心他, 但作為他的朋友, 看見他的愁眉苦臉, 他口裏雖說沒大不了, 但知道他心底裏總是滿肚子悶氣. 經驗話我知, 一見到他用英文和我通訊的時候就知道他內心非常不平安.

我唯有叫自己唔好煩擾他. 他想找人分擔或陪他的時候他自然會出聲.

上主, 求你保祐我這位朋友, 令他可以變回以前開開心心的一個人.

矛盾?

這陣子覺得自己好鬼煩, 又麻煩到人, 自己又覺得煩壓.

在澳洲讀書的時候, 已經令我明白很多事情是要靠自己, 不可能靠其他人幫忙. 這種感覺在這數年間非常深刻. 不但在工作, 生活, 什至情感的控制, 都要完全依賴自己的能力. 別人或許願意去聽你的苦訴, 但最後都是由自己去作最後的決定. 現在我還覺得和別人傾談自己不愉快的事, 對別人可能做成不必要的麻煩. 例如別人不一定想聽, 還有聽完可能他/她也會受到影響, 這是我不想見到的情景. 寫這個blog的一個原因, 就是自己說出來, 不用麻煩其他人.

雖然是這樣說, 我的文字表達能力有限, 始終比較喜歡和自己的好朋友聊天, 這樣比較直接. 我是否好矛盾呢? 我自己都不知道. 我就是這種矛盾的人. 就是這樣, 我才有這麽多亂想 :p

今日好燥

自從決定留番係而家間公司做野之後, 發覺個人越o黎越燥, 唔係忟麻煩秘書就係忟個老細. 一個就諸事八卦, 樣樣細野都要煩你, 話問你, 實際係唔想做. 一個就諗到天花龍鳳, 唔肯孭飛, 行假民主既一套.
日日唔係俾呢個煩, 就係個個煩. 我驚我遲早會殺人. 到底我既EQ可以去到幾高, 真係一個好大既考驗. 今日麻煩老細個秘書講呀老細要點, 我本想駁佢, 但最後我話我唔再comment, 是但啦. 跟住呀麻煩秘書又係度煩, 話呀老細秘書點解會有佢份野. 我話呢個問題唔大, 只係諗點樣做好跟住要做既野, 佢就仲係度咦咦哦哦, 仲係度講佢唔應該有呢份野. 我最後好大聲咁講 "呢樣野我唔care", 跟住就返埋位. 我覺很好鬼煩呀. 諗點樣做好咪算囉, 仲要係度追究. 搵到又點jeh, 有奬呀. 痴孖筋.

又是一個失眠夜

尋晚又是兩點幾醒左. 今次可能係熱醒. 但跟住就訓得唔係幾好. 我個眼袋就o黎大過傻佬達個個.

訓唔著, 一如以往, 又諗野. 今次諗如果有朋友欺騙我, 我會點樣呢. 寛恕佢, 幫佢諗好說話, 我諗我起初會咁樣諗. 但最後我都唔會再同呢位朋友來往. 因為我最憎人欺騙我. 自問用真誠對待人, 如果人地利用呢點欺騙我的話, 那豈不是不當我是朋友, 那麽我還和他相處有什麼意思呢.

但有些人或會說他欺騙你可能是對你好喎, 諗諗下又可能係, 但始終覺得如果大家唔能夠坦誠的話, 大家好難做到好朋友.

無言感激

今天真的好累.

朝早返學, 上堂又要好留心喎. 雖然係咁, 但又係答錯幾條問題, 好核突. 唔理loo.....

放學即刻趕返屋企, 買盒大家樂, 食完又要趕入西貢同教會歌詠團班兄弟姊妹會合. 落著毛毛細雨, 有些擔心去到鹽田梓個陣會落大雨. 想想下有位姊妹突然叫我, 原來她叫我幫手拿東西, 她們在和艇家議價買海鮮, 等著夜晚一餐豐富的大餐. 佢地講價真係好勁, 真係要多多學習. 嘩...好生猛同好重呀. 同她們買完仲要拎去酒家, 拎到去隻手都幾攰.

好啦...上船啦....坐左大約廿分鐘去到鹽田梓. 那處已經是一個荒島. 居民都在六年前全部搬出. 現在剩下一間教堂同一間軍事學校 (剛巧我們遇上一班打war game 的團體). 我們今次的目的地就是那間小教堂. 唔好睇少佢, 佢就係香港第一間教堂. 入到去的感覺好寧靜. 我們真的很好彩, 原本我們是不可以入去的, 因訂不到. 但訂了的團體 (油麻地天主教學校)臨時取消行程. 我們便可以"佔用" 那間教堂. 在那裏, 我們舉行了拜苦路的儀式. 感覺很特別, 因為心中真的很平和. 我們唱歌時回音都好正. 細教堂有它的好處. 完了後我們行了少少山, 但因時間很趕, 結果要中途折回. 大家在一片歡呼聲回程了.

在碼頭接過了神父之後..嘩, 晚餐o黎啦. 好豐富呀, 有八爪魚啦, 魚啦, 蝦, 蟹, 聖子, 扇貝, 雞, 菜, 肉, 仲有炒飯, 柑...... 自己個胃唔好, 所以唔敢食咁飽. 但真的好好味. 最後計數, 每人平均$110. 好抵呀.....講價叻真係唔同.

今次是第一次同歌詠團班手足一齊出去神修同聚會, 感覺好開心. 我要感謝上主, 在我心情最低落的時候給我認識到這班朋友. 祂已經不是第一次這樣幫助我, 以前都試過好多次. 我唔知點樣去多謝祂. 只有說聲感謝你.

久別了的感覺

今日打了一場網球. 很久沒有打得這麽爽了. 雖然有時跟不上速度, 但打到自己想打到的波, 那種快感難以形容. 最慶幸對面個位都一樣打很咁爽. 正呀. 打完有些累, 但沖完涼之後覺得另一種爽的感覺. 如果不是要返church, 去浸下大浴缸(泳池)會是一個不錯的選擇. 要學古怪基咁講 : 我其實好鍾意運動架.

夜晚同老友食晚飯, 很久沒有和他一起在星期六晚上吃飯了. 看見他倦透了的臉容, 真的有點擔心他. 希望他可以多些休息, 回復一個"靚仔"樣 :p 仲有就係見到佢身體健康, 精神飽滿就最好不過啦.

禮拜六的晚上常常有些失落的感覺, 因已經過了假期的一半啦.

木匠樂隊

今日家人終於知道我要入醫院檢查的消息. 可能是我遠方的家姐說的. 但我還是沒有告訴他們我何時入院.

今晚在灣仔188 買了隻木匠樂隊的專輯. $85 有35首歌, 很便宜. 喜歡他們的歌, 打從我在澳洲讀書的時候. 那時候常和同學仔聽/唱英文歌, 個陣很喜歡 country 味好重的 folk songs . 木匠樂隊簡直是首選. 當自己一個人聽他們的歌時, 感覺很舒服, 像返回當時住宿舍, 和一班好友常常聚在一起聊天, 食公仔麵的情景. yesterday once more, top of the world, only yesterday 等等簡直是我的至愛.

我喜歡懷舊, 所以這些歌正中我下懷. 無論五年, 十年之後, 我很清楚我還是喜歡這些歌.

我是一個驕傲的人?

壞消息繼續在我身上發生. 今天遠方的親友打電話來, 說有人話我很驕傲. 我完全摸不著頭腦, 我驕在那裏, 我又可以憑什麼傲得起. 有些時候, 我不想和人爭執, 所以寧願保持沉黙. 最近自己都好煩, 莫非這樣就可以話我態度唔好. 那個人我不太想和他談話, 因為十次有九次都是涉及金錢的. 我和他說轉工, 他第一個問題唔係是不是做得不開心, 而是人工高嗎. 上次轉工都是這樣. 我真的不想大家的關係是建立在金錢上. 由始至終, 我都不想和他說金錢. 就算當初買樓時, 他說可以幫我, 讓我可以慢慢攤還. 我一口就拒絶. 因為如果我答應了, 他就會在我有生之年常常拿這件事情做"痛腳", 訴說我無情呀, 自私呀. 所以我寧願靠自己.

這樣的指責我完全不能接受.

終於都要面對

今日去看醫生, 是這個月內第四次, 又是要看看我罷了工的胃. 正如所料, 要入院照胃鏡, 還要照超聲波, 醫生說要看看膽是否有什麼問題. 因為保險的關係, 我應該要入院住一晚. 醫生說照胃鏡前會打睡覺針, 等我慢慢入睡才照. 我在想如果這樣就離開了這個世界是多麽好呢, 什麽也不用再理會, 不用再煩惱. 我沒有和家人說, 因今晚家裏又發生事, 又是由細到大經歴的那種事. 我不想再理會, 因為現在的我已經好煩, 唔想再為那些小事化大既事情再憂慮.

醫生都有問我會否是壓力問題, 我告訴他我已經成個月沒有好好睡過. 他開了些減壓藥給我
, 希望幫我舒援一下.

我會不會輕地走了, 不帶走一片雲彩呢?

迎合別人

最近睇一本書, 一打開就見到這句很有意義的idioms

Constantly trying to please others guarantees stress. You can respect and love others without living your life for them.

自己一生人都在迎合別人, 細個要迎合老師, 做個好好的學生, 在公司要迎合老細, 做個好好的下屬. 拍拖個陣要迎合女朋友, 要氹佢開心等等. 就如這句所說, 這些迎合帶來的是壓力. 生活好似給這些壓力所拖累著. 這些心態我想都是自己的性格. 正如之前所說, 我很著意其他人對自己的看法. 我不想有任何一個敵人. 幸好現在的我, 樣子生得比較"年青", 就算得罪人, 別人都只是當你小孩子看待, 沒有太大的敵意. 但就算是這樣, 自己都很計較其他人會否不喜歡, 尤其是我的好朋友. 因為這樣, 我很多事情都會想得比別人多, 很多負面的都會想到, 例如其他人會否覺得自己好煩, 又例如寫這blog是否摶同情等等. 就是這些想法令自己更加活在痛苦中.

我可否改變這種想法? 我都不知道, 但正在努力階段. 大大力, 你要加油.

連鎖反應

我很容易給身邊人的情緒所影響, 尤其是至親的或是我的好友. 今天我一個好友心情壞透了. 我不知道怎樣安慰他. 唯有向他說他如果想找人傾談的就找我啦, 自問都是一個好好的聆聽者. 希望對方訴說了自己辛酸的事後會感覺好些. 這個好友很像我, 有不開心的時候總是收在心底, 令自己悶悶不樂. 因為自己都是這樣, 所以很明白他的感受. 就算你想和他說話, 他都是不想, 想自己一個人靜下來. 雖然大約知道他為何不快樂, 見到他這樣子, 自己也都不開心. 因為有些擔心他. 唯有替他禱告, 默默等他想找人談話時借出自己的耳朵.

人生中的賭博

今日幾乎全日都係公司同自己的好友傾轉唔轉工好. 佢地係支持我轉既. 因佢地都覺得我同我老細好難夾得埋. 朝早開會冇得諗. 晏晝三點幾老細打o黎問我決定未. 用左五分鐘同自己作"結案陳詞", 最後走人老細房同佢講我會留低. 我既決定係因為覺得去到新公司問題都一樣唔明朗化. 這個決定只是賭一鋪. 結果係點將來就會知道. 我現在唯有當係一個過渡時期, 考驗自己既eq 係可以去到幾多.

人生好多時候都要作出類似這樣的賭摶. 是輸是嬴將來一定知道.

思絮混亂

開始寫blog 係因為呢輪思絮非常混亂. 每天所想的事情太多, 很多事情都想同人講, 但又怕麻煩別人, 所以決定寫下來.

今朝又四點醒左, 個胃又開始唔聽話. 我諗我個胃罷工係因為情緒問題.

今朝醒左個腦諗到的事情仍然是那一件事. 這是我不太願意, 因為一想起這事, 我接下來根本沒可能再入睡. 其實這份執著是否因為自己的性格問題. 由細到大, 自己都很著意自己付出有沒有回報. 自己付出了百份之二百, 就會盼望對方對自己付出同様的時間同感情. 但人越大, 這種想法已經逐漸減少. 現在自己都是付出了百份之二百, 但已經不盼望有什麼回報. 因為希望越大, 失望越大.

現在表面上自己看來好像沒有什麼似的, 但心裏那根刺仍然深深插入自己的心. 這根刺是自己做成的. 我可以在別人面前扮作若無其事, 但內心那種不安同不快樂, 只有自己同上主知道.

每晚回家望出窗外時真的想過不如所有事情都重新開始. 這樣對自己是不是一個好好的做法, 定只是一個逃避的想法, 我不知道.

轉工唔轉工?

呢幾個禮拜好煩, 因要決定轉唔轉工? 同好多朋友傾過, 意見參半. 冇一個可以俾到一個好明顯既答案. 咁又係既, 唔通叫人教你點做人咩.

新公司同而家個間各有千秋. 要考慮的除左人工(不過唔係我最大要考慮既因素), 仲有老闆, 工作新鮮感, 人事關係, 公司文化等等. 呢輪已經夠煩, 仲要諗埋呢d野, 想死.

聽日係死線啦, 但我都未有一個最後既決定. 又想轉又想唔轉. 好矛盾. 聽朝冇一個答案就決定留低啦. 紿終做生不如做熟, 當係對自己一個磨練. 但之後既生活會好艱巨, 因為要應付而家呢個老闆. 一個鍾意攞彩而又冇乜人情味既老闆

將來還有希望嗎?

2007年一開始好多不如意既事就發生了. 諗野仍都比以前幾年多.

發生的種種事, 令我對將來已經冇乜盼望. 我只識得安慰人, 但我唔識安慰自己. 自二月頭起, 我晚晚都訓得好差. 一紥醒就諗野, 諗的都是同一件事. 一件令我都算打擊好大的事. 其實用理智方面去諗, 跟本就係自私既諗法, 但情感上我已經崩潰. 這是以前從未發生過的. 以前就算係有什麼不開心, 都是開罐啤酒, 坐係窗台就感覺好好多. 但今次我是控制唔到自己. 到而家就算係訓到, 發夢都有夢到那處地方. 這個心魔太恐怖啦, 將我折磨得太厲害. 可能因為咁, 身體接二連三發生毛病. 胃口大減, 精神不集中. 現在一個人靜落o黎, 就會胡思亂想. 最後唔係用讀書就係打機o黎麻醉自己.

這是誰的錯? 沒有人. 是自己搞成自己咁既. 將來? 我都不會再去想會是怎樣. 因為我已經冇乜期望. 以前的付出, 從來都沒有想過要什麼回報. 到現在都是這樣諗.

我, 幾時會醒?