復活節

今年既復活節比起舊年忙好多.

聖週四晏晝完成一個冗長既會議後, 拿拿臨趕去教堂, 參與最後晚餐禮儀. 個晚唔係我地葡萄園負責, 本來冇諗住唱, 再加上個晚有D胃痛, 諗住坐埋一邊算數, 但去到教堂見到peter 坐係choir 席那邊, 所以都走去同佢一齊坐. 再望下, 那晚負責既團男聲真係好單薄. 所以都唱埋一份. 老實講, 負責個個團真係準備唔好足夠, 真係錯漏百出. 個晚自己把聲好好. 唱得好開心. 唱完個胃竟然冇事, 可能放晒d胃氣出嚟 :p

聖週五係耶穌苦難日, 天主教傳統係要守大齋, 即係全日唔可以食熱血動物既肉, 同埋只可以有一餐飽. 朝早起身就只係食左一塊餅乾同飲左包維他奶. 跟住讀日文同係屋企練歌. 一如往年, 我係要負責領唱"基督譴責". 呢排係屋企練左好多次, 覺得應該今年好過舊年卦. 不過把聲冇早一晚咁好. 都有d擔心. 晏晝食左輕便既午餐後就返教堂準備參加拜苦路. 我地要負責唱歌部份. 嘩.....多人到呢...教堂出面企滿晒人, 有d意料不及. 中間又發生左喇叭冇聲等等事件. 慶幸平安渡過. 跟住練歌準備是晚既禮儀. 哎......把聲好沙, 又睇錯段數. 希望今晚好d. 過左幾個鐘, 我開始咳, 心知不妙, 因為呢個係我緊張既訊號. 其實舊年都唱過啦, 做乜又咁緊張呀. 越近我個part , 我就越該得厲害. 好啦. 到我啦..... 一開聲...救命...把聲唔得, 有d顛. 係屋企練到既野又唔記得晒. 仲有......唱第五段 (總共十二段)又睇錯上一段, 唱錯一句. 好彩執生成功, 唔係仲核突. 唱完冇咳啦, 但唔係太開心. 之後收到幾個comment (全部善意既好彩). 有個話我抖氣唔係太啱 (我都知, 其實係屋企練過下, 但唱個陣唔記得晒), 我係教會上音樂堂既呀sir 話我太緊張. 指揮番茄話出面應該唔知我唱錯 (因好多人當時係排緊隊), 佢都唔知我出錯添. 一個緊張真係令我變晒型.... 個晚訓得唔好.

聖週六大日子到啦. 朝早同老友達係樓下3號場打左一個網球熱身, 跟住加埋alan 同 tony 係新既4號場打多一個鐘. 個新場幾好. 打得好開心, 不過打完好攰. 食完晏抖一陣又要返我第三個屋企 - 教堂 (我越嚟越覺得返到去好開心). 練歌由三點半練到六點左右, 練完都幾攰. 跟住同埋其他choir 既朋友去食飯, 其間認識左詠主之聲個團既兄弟姊妹. 佢地係負責是晚禮儀既團體. 同佢地合作都算係咁啦. 指揮呀芳真係指得幾好. 班領唱既大哥大姐真係唱得好專業. 好佩服. 其實我可以請老友達教我唱歌, 但越熟就越唔好, 因為我會"唔聽話". 到時教個個又抆, 學個個又懶, 死得 :p 今晚有成一百三個人領洗, 成個禮儀接近三句鐘, 我地choir 差唔多要唱三十首歌 (有d要唱幾次, 有d有成六七段). 之前係屋企聽左好多次midi, 所以冇乜問題. 不過間唔中個個都要抖下把聲, 因為好攰. 十點左右, 成個禮儀完畢, 覺得好開心. 因為今晚覺得自己唱得幾好. 可能有實力派人仕simon企係後面, 幫手"鎖死" d音 (當然 peter 企係我隔離都幫左我唔少), 所以我有d唔駛捉音捉得咁辛苦 :p. 完左之後, 一如以往去大食一餐.

禮拜日朝早起身, 個人仲係好攰 (不論把聲定個人), 好似散晒咁樣. 朝早出左銅鑼灣同屋企飲茶. 跟住就走左去九龍灣會展睇玩具展. 今次係我第四次去啦. 係第一二次較多野睇同多野賣. 最近一兩次真係差左好多, 價錢又唔係太平. 行左一陣, 等埋個抽奬就閃. 我張飛係5021, 抽到朝早section大奬個位係5025!!!!!!!!!!!! 早知遲少少入 :p 諗住咁早出下旺角買野. 好好彩俾我係先達見到wii 盒decasporta. 好多鋪頭都賣晒..... 好開心, 終於買到. 跟住行左去油麻地踏地鐵返屋企. 返到屋企玩陣wii fit 同盒新game. 玩左羽毛球, 沙灘排球, 射箭同花式溜冰. 都幾得意. 雖然個羽毛球幾好玩, 但都係鍾意打真既毛毛波, 好玩好多.

到禮拜一啦, 有D失落, 因為聽日要開工啦. 今日真係休息日. 本來想去游下水, 但諗下都係係屋企抖下, 因為呢輪真係好攰. 今日做既野唔多, 係屋企讀下日文, 玩下WII, NDS, 訓下晏晝覺 (好耐冇試過咁悠閒 :P), 聽下歌仔, 好快咁就一日. 今日終於見到藍天, 所以係將中食完晏都係出面行左一陣, 真係舒服到呢............... 夜晚突然心血來潮, 決定煮飯仔, 順便煮埋聽日晏晝個餐. 食完飯抺乾淨個廚房. 覺得好滿足. 都有諗過不如落去會所游下水, 但結果同朝早一樣.

咁就過完一連四日既假期. 要諗下下次幾時放假. 舊年仲有十八日半未放. 要今年九月尾放晒. 今年返唔返澳洲真係要取決於D澳幣點樣. 而家高到咁得人驚. 唔想晒錢. 寧願係香港好過. 如果唔放. 真係可以提早放我既例五假期.

搵工?

呢輪個市真係幾好. 最近有兩個獵頭人打電話俾我.

獵頭A一打嚟就話P公司老闆想請人, 只有我合乎個資格. 當我傻架咩?! 首先我識個個老闆(不過唔算好熟, 只係傾過幾次電話), 我舊老闆都係個邊. 如果佢地想搵我, 都會叫我舊老闆直接搵我, 駛鬼經你地咩. 禮貎上我話"係咩?". 跟住佢SEND 左個JD俾我, 睇落都唔差. 而且P 公司都幾好, 所以就俾左個CV 佢. 前個禮拜五約左個老闆出嚟飲野, 傾下佢想搵咩人. 佢都好老實, 講左想搵咩人. 其實我係啱個個位 (以我既經驗嚟講). 但我最唔放心係佢想搵一個人返去幫佢改而家個工作程序. 呢d係三煞位, 好易得罪人. 佢係我舊老細身上都有問我D野架啦, 知道我既人工添. 佢話人工可能會係一個問題. 噢....雖然錢唔係我最大轉工既原因, 但又係三煞位, 又咁樣....我又點會say 繼續proceed 個application 呢. 不過想講既重點唔係呢度, 係個間獵頭A. 由始至終我都冇見過佢. 我同個個老闆講乜咁兒戲既. 佢都話係咯. 跟住我問係咪因為佢地同佢簽左合約, 所以係咪都要搵佢地. 原來P公司個老闆同呢間獵頭公司個老闆係老友, 所以就搵佢地. 都幾易做喎, 打幾個電話唔駛做就可以收佣. 後嚟我同獵頭A 講唔繼續咯. 佢話明白. 仲話係佢老闆refer 我個case 俾佢, 所以想同佢老闆約我飲野. 我話好呀, 等我可以知道市價都好. :p

獵頭B 又係上個禮拜打電話嚟. 呢個獵頭B以前係我地公司做, 所以都搵左我好多次, 我次次都話唔啱. 今次佢又SEND 個JD 嚟. 睇落同我而家做既野差唔多. 估計係N 公司. 未決定去唔去見下.

係而家問公司做左都好長時間, 轉工唔係好易決定既事, 暫時都可以接受而家做既野, 所以係無心插柳之下試下見工. 又當俾個機會自己囉.