又一年啦

今日係二月十二日, 過左一年啦. 舊年呢段時間好唔開心. 一年之後有咩變化?!

工作上而家忙到痴筋. 樣樣野都堆埋嚟. 老細仲係我個appraisal 其中一項objective 到寫要我(及同階級既同事)係呢一年諗d可以幫部門攞分既野. 救命. 個個都忙到咁, 仲要諗埋呢d野. 對唔住, 我唔鍾意應酬老細同攞彩, 識我既人知道我最鍾意低調, 所以我呢一項實肥緊. . 最近知道我老細升左職.....天呀......冇野好講. O 晒嘴! 當然會恭喜佢. 話晒大家只係做野唔同方法, 私底下我仲當佢係朋友.

前一輪有個台灣老闆問我過唔過去做野. 係一個部門老闆位. 收到佢電話個陣真係想答佢"好呀". 因為講真而家返工唔係太開心. 同一個做野方針同自己好唔同既老闆做野係好辛苦既事. 最後當然我冇答應佢, 唔係既話我唔會係呢到同你地講呢d 野.

情感上既事情我好少係度講, 因為我係收收埋埋既電車男一族. 總之暫時都同以前冇乜分別. 要突破 唔係一件容易既事. 咁多年既問題唔係一時三刻可以解決. 我相信愛一個人, 唔等如要擁有或者(衰D講句)控制呢個人, 也不一定會有回報. 自己付出又感覺開心便算了. 其他事情自己控制唔到就唔好諗咁多.

我隔離個老死同事派利是俾我都七年啦, 次次都講派埋今次架咋. 我話"睬你都傻, 利是會繼續拎" :p 所以唔好再同我講呢d 無聊說話. 我唔buy 架.

身體同舊年差唔多, 唔係呢度有問題, 就係個度有問題. 最困擾我都係膝頭個位呀哥. 幾次行山落好多樓梯既話就會痛. 直情係痺添. 我真係一個老人家. 冇得救. 今年都係好懶, 冇乜點游過水, 又冇乜踩過單車. 慶幸仲有同老友達打下廳立士.

今年係放左多d 時間係音樂上面, 自己知自己乜料, 所以要惡補. 希望可以做得好d. 呢樣都係我心靈寄托之一.

隻眼同個心都好攰, 暫且停筆, 容後再談.