激光矯視 (lasik)

認真想了數年, 今年終於決定去做激光矯視手術. 為了不想浪費今年的泳季, 我等到八月最後一日, 即我生日那一天去驗眼. 其實之前好友L 有介紹一個醫生給我. 在鄰居聊天室上有幾位好友都有談輪在邊度做. 但考慮這個決定會影響很大, 我在網上看了很多其他人的意見, 也有問養和一個做家庭醫生的舊同學. 最後決定係養和做呢個手術.

養和有兩個價錢, 一個是指定醫生($22k, 覆診另計), 一個是套餐($16k 包覆診). 套餐是不可以選擇醫生的. 徵詢了舊同學的意見, 最後決定選陳偉民醫生做這次手術.

生日那天去養和驗眼, 差唔多在那裏坐足三個小時, 做完檢查A, 又做檢查B. 差唔多最後半小時才見醫生. 陳醫生真的很有耐情, 解釋得好清楚. 佢話我個lens 夠厚度做lasik. 最後約時間做手術. 本想星期五做, 因為唔想請假. 近來在公司忙著一個極大的project, 請假會好麻煩. 誰知護士小姐話醫生只係星期三個手術. 在不願意的情況下選擇了在星期三做. 回到公司同老闆傾. 我同佢講會將這次放假影響減到最少, 我會在放假的時候繼續做公司的事情. 可以用電話遙遠控制.

過去的星期三就是我手術的大日子. 那天出奇地我心情好平靜. 可能因為只係感到很累, 什麼都不想去思考. 好友L 陪我去醫院. 去到較預期的時間早了四十五分鐘. 登記完護士小姐帶我去了一個等候室. 係一個獨立的等候室, 面續大約三十呎左右啦. 入面有一張椅, 一個櫃. 坐了幾分鐘就有另外一個護士來到講解手術的程序. 跟住我就係呢三十呎既"位置" 呆等了四十五鐘. 那裏其實有數本雜誌, 但都是些很悶的雜誌. 因為太悶, 我有時候會伸個頭出簾望下其他人. (可想而知係悶得幾緊要). 四十五鐘後, 一位姑娘來到話醫生要接見我啦. 終於等到.

醫生循例驗我的眼睛, 跟住話係我個角膜做些記號. 佢拿著一支好似針既物體在我的眼睛篤下篤下. 有一兩下真係幾痛. 驗完護士幫我滴眼藥水, 帶我入手術室. 心情仍然好平靜.

入到去, 佢叫我訓在一張冷冰冰的床上. 陳醫生叫我放鬆. 我心想我會的, 因為我想快些做完, 快些回家休息. 佢放了一個類似架的東西在我左眼的眼球上. 接著一部機器徐徐壓下在我眼球上. 那時候我的左眼是完全看不見事情的. 只是感覺壓下的感覺不是太舒適. 幸好過了三十秒左右, 左眼已經做完. 之後是右眼. 這樣就完成第一步 (用激光在角膜切開一個小孔). 完成後護士小姐帶我去另外一間房. 那時候是感覺矇矇地, 好像前面是一片霧.

接著是第二步 (用激光改變lens 的形狀). 陳醫生繼續叫我放鬆. 他用膠紙固定我眼皮的位置. 然後滴了些不知是什麼的液體. 我感覺到他揭開剛在第一步做成的角膜小瓣. 然後一部機器放在我左眼上, 我見到一點綠色的光點, 我就望著它. 當機器操作時, 我看到那點綠光變做紅色, 然後聽到機器的"滋滋"聲, 又聞到少少的燒焦味. 過了三十秒鐘, 左眼已經做完. 接著是右眼. 完成後醫生說很順利. 之後姑娘帶了我出了手術室, 驗血壓, 然後陳醫生再驗我雙眼. 他說手術很好. 那時已經差不多下午一時左右. 護士小姐可能趕住去食飯. 醫生驗完後就將我帶出等候室 (其他人她們會帶回等候室). 我見好友L 坐到呆滯的樣子, 就知自己都算睇得好清楚 :p 之後就坐的士返回家中休息.

第二天去覆診又用了兩個小時. 主要是等 (因很多病人). 首先是驗度數. 因為是第一天, 所以視光師話大多不穏定. 最後是驗到無近視, 但有少許遠視. 視光師小姐說是正常的, 因為近視是會"回來"的, 所以醫生大多會做多少許. 驗完後又要等見陳醫生. 在等的期間我check 公司的電郵. 撞鬼, 沒有回公司一天, 已經有一百個電郵. 後來還沒有輪到我, 我便打電話返公司開一個conference call. 等了差不多三十至四十五分, 終於可以見到陳醫生. 他說傷口沒有太大問題了.

現在看近的文字時是有少許不淸楚. 夜晚也見到很多光暈. 不過這是正常現象. 希望這些情況快些過去. 其實最麻煩的不是這樣, 是夜晚睡覺要帶眼罩做咸蛋超人同埋洗頭要好小心. 這些生活的不便也都是短暫的. 現正等待下個星期的覆診.

回歸灣仔

見到這個題目不要以為我下星期就搬返灣仔返工. 事實上我三個月之後才會搬返去. 舊部門就明天正式搬返司徒拔道.

今日在公司執拾細軟. 雖然我平時都會執下野, 但唔經唔覺都執了四大紙箱. 一個雜物箱, 另外兩個箱都是做了這麽多年的資料文件夾. 最後一個箱就是存放檯燈及其他易碎的物件. 我發覺自己執拾能力都不算差. 好多比較細少零碎的東西都可以收拾得非常好 (例如用香口膠的膠盒儲存萬字夾是最好的. 以前儲存microfiches 的硬盒最適宜放易碎的東西...等等). 回想三年半前搬入中環時今次是多了些雜物. 大部份的紙張都給我徹底消毁了.

時間真的過得很快. 好像昨天才搬入中環似的. 那種新鮮感到現在都是難以形容. 全新的意大利檯櫈, 高高的樓層, 寛大的茶水間及廁所. 這些都是陪我渡過了三年寒暑的地方及物件. 都有少少不捨得它們. 幸好還有三個月給我懷念這個地方. 在灣仔返工都不是什麼新鮮的事情了, 以往大部份時間都是在那裏返工. 行街食飯是比較方便, 是刮風落大雨時就真的不知所措. 現在還要忍受那台好像龜一樣慢的電梯. 返工是要轉車, 但所需時間差不多.

灣仔那邊的新位置都是有兩邊窗, 是樓層其中一個角落位. 今次都是自己選擇的 (因為我人緣唔差, 所以可以優先選擇位置....哈哈 :p). 新位置最好的就是......仍然和老闆隔得遠遠. 不過因為公司新規定, 以後的位置又要縮少一半 (以前是一間房, 後來在中環變成兩個位, 現在是一個位. 再遲些可能各位要拿著一部手提電腦分享一張大檯). 今次新位置的"景色"和以前在灣仔時都差不多, 都是墳景加山景再加馬場景. 都不算太差.

灣仔.... 三個月再見!!!

2009年

今天是2009年的第一天, 首先同各位讀者說聲"新年快樂".

今日除了是新一年的開始, 也是我正式調入Investment部門培訓的第零天. 為何是第零天, 因為今日是公眾假期, 但名義上我是已經離開了精算部. 這次培訓為期半年. 很多朋友問我現在是金融風暴的高峰期, 在投資部培訓還有沒有用. 答案是有用的, 因為我去的是投資部主要負責債券管埋同credit analysis的部門, 不是真正參與落盤的部門. 以前在精算部工作主要是負責產品設計及批核, 很多時都要與這個投資部門的同事合作. 所以希望今次培訓應該會"滿載而歸".

人事方面不算大問題, 因為這個部門大部份員工我都是認識的.

雖然說是培訓, 但現在在精算部忙著的一個project, 我仍然要繼續跟下去. 不知何時終結.

新一年, 新挑戰. 大力....衝呀!!!!! (不過盼望不要那麽晚才放工, 因為我仍然有好多私人事要做, 例如回家休息這麽大的一件事...:p)

自我安慰

呢兩個月公司出了事. 母公司俾其中一個衰仔搞到差d破產. 而家仲要賣仔還債. 唔講係財政上既損失. 呢兩個月不輪心理同身理都因為呢件事被搞到遍體麟傷. 呢輪係公司既話題大部份都係圍繞公司既將來. 例如大家會唔會冇野做呀, 公司跟住會點重組, 點樣cut cost 法. 一間做左十幾年既公司會唔會就咁玩完呢. 唔捨得既唔只係間公司, 仲有一班同事. 雖然對公司仲有信心, 但日日聽聽埋埋自己都會有d擔心. 有事唔代表唔駛做野,反而多野做到發癲. 仲要係一個好急既project. 我主導其中一part 都忟到死. 唔單只co-ordination 好差, 仲有d指示非常唔清晰, 加埋一個老闆好似發晒癲咁 (好似唔知人辛苦), 日日同隔離位同事就由朝早嘆氣到夜晚. 自己又唔可以係班o靚面前怨喎. 反之仲要tum佢地 (連team head 都要tum, 死未). 呢個project都唔知幾時完.而家聽到呢個project真係想死.

現在可以做既就係返工等放工, 放左工就做自己鍾意既野. 所以老細話俾部blackberry我, 我都擰晒手話唔要...因為我都要自己既時間. 我冇咁偉大, 24小時奉獻晒俾公司. life is not just for work 就係我呢段時間既左右銘同埋安慰別人既說話.

好鍾意訓晏覺

自從係馬來西亞返嚟之後, D咳都未好過. 睇西醫話喉嚨敏感. 食完D藥都未有好轉. 朝早起身D痰同鼻水多到呢. 禮拜六既打邊爐都去唔到 :'( .結果決定去睇中醫, 飲左一兩劑後, 好少少, 今日落去游埋水之後好似又好D添, 唔通游水可以治療我既病 :P

我搬左嚟維景四年就做足農夫咁耐, 放假都係七點幾起身, 有少少光就會醒. 以前係北角住唔係咁架喎, 禮拜六可以訓到十點十一點架. 可能見我懶得滯唔俾我訓咁多. 呢幾日係屋企主要休息. 晏晝係梳化訓覺係好鬼舒服, 雖然訓得唔多 (通常係十五分鐘至三十分鐘, 今日最叻, 訓左一個鐘), 醒左好似好精神. 但唔夠一個鐘又會覺得好攰. 唔通個醫生講既壓力病就係呢D, 即係腳痛呀, 全身乏力等等.

聽日要返工啦. 又要面對個D無形既壓力. 好彩就快放我既例五假. 到時要好好"歎"下. 同埋要讀日文啦..放埋一邊好鬼耐. 好對唔住佢 :P

為四川受難者默哀!

上主, 求祢垂顧那些在四川向祢呼號的災民. 他們很需要你的救援, 安慰和扶助. 願你把平安, 通過你的護慰者降於他們的心中. 使他們創傷的心靈得到治癒.

聖母瑪利亞, 你是病人之痊, 憂苦之慰. 請你為四川的災民向上主代禱.

Amen!

復活節

今年既復活節比起舊年忙好多.

聖週四晏晝完成一個冗長既會議後, 拿拿臨趕去教堂, 參與最後晚餐禮儀. 個晚唔係我地葡萄園負責, 本來冇諗住唱, 再加上個晚有D胃痛, 諗住坐埋一邊算數, 但去到教堂見到peter 坐係choir 席那邊, 所以都走去同佢一齊坐. 再望下, 那晚負責既團男聲真係好單薄. 所以都唱埋一份. 老實講, 負責個個團真係準備唔好足夠, 真係錯漏百出. 個晚自己把聲好好. 唱得好開心. 唱完個胃竟然冇事, 可能放晒d胃氣出嚟 :p

聖週五係耶穌苦難日, 天主教傳統係要守大齋, 即係全日唔可以食熱血動物既肉, 同埋只可以有一餐飽. 朝早起身就只係食左一塊餅乾同飲左包維他奶. 跟住讀日文同係屋企練歌. 一如往年, 我係要負責領唱"基督譴責". 呢排係屋企練左好多次, 覺得應該今年好過舊年卦. 不過把聲冇早一晚咁好. 都有d擔心. 晏晝食左輕便既午餐後就返教堂準備參加拜苦路. 我地要負責唱歌部份. 嘩.....多人到呢...教堂出面企滿晒人, 有d意料不及. 中間又發生左喇叭冇聲等等事件. 慶幸平安渡過. 跟住練歌準備是晚既禮儀. 哎......把聲好沙, 又睇錯段數. 希望今晚好d. 過左幾個鐘, 我開始咳, 心知不妙, 因為呢個係我緊張既訊號. 其實舊年都唱過啦, 做乜又咁緊張呀. 越近我個part , 我就越該得厲害. 好啦. 到我啦..... 一開聲...救命...把聲唔得, 有d顛. 係屋企練到既野又唔記得晒. 仲有......唱第五段 (總共十二段)又睇錯上一段, 唱錯一句. 好彩執生成功, 唔係仲核突. 唱完冇咳啦, 但唔係太開心. 之後收到幾個comment (全部善意既好彩). 有個話我抖氣唔係太啱 (我都知, 其實係屋企練過下, 但唱個陣唔記得晒), 我係教會上音樂堂既呀sir 話我太緊張. 指揮番茄話出面應該唔知我唱錯 (因好多人當時係排緊隊), 佢都唔知我出錯添. 一個緊張真係令我變晒型.... 個晚訓得唔好.

聖週六大日子到啦. 朝早同老友達係樓下3號場打左一個網球熱身, 跟住加埋alan 同 tony 係新既4號場打多一個鐘. 個新場幾好. 打得好開心, 不過打完好攰. 食完晏抖一陣又要返我第三個屋企 - 教堂 (我越嚟越覺得返到去好開心). 練歌由三點半練到六點左右, 練完都幾攰. 跟住同埋其他choir 既朋友去食飯, 其間認識左詠主之聲個團既兄弟姊妹. 佢地係負責是晚禮儀既團體. 同佢地合作都算係咁啦. 指揮呀芳真係指得幾好. 班領唱既大哥大姐真係唱得好專業. 好佩服. 其實我可以請老友達教我唱歌, 但越熟就越唔好, 因為我會"唔聽話". 到時教個個又抆, 學個個又懶, 死得 :p 今晚有成一百三個人領洗, 成個禮儀接近三句鐘, 我地choir 差唔多要唱三十首歌 (有d要唱幾次, 有d有成六七段). 之前係屋企聽左好多次midi, 所以冇乜問題. 不過間唔中個個都要抖下把聲, 因為好攰. 十點左右, 成個禮儀完畢, 覺得好開心. 因為今晚覺得自己唱得幾好. 可能有實力派人仕simon企係後面, 幫手"鎖死" d音 (當然 peter 企係我隔離都幫左我唔少), 所以我有d唔駛捉音捉得咁辛苦 :p. 完左之後, 一如以往去大食一餐.

禮拜日朝早起身, 個人仲係好攰 (不論把聲定個人), 好似散晒咁樣. 朝早出左銅鑼灣同屋企飲茶. 跟住就走左去九龍灣會展睇玩具展. 今次係我第四次去啦. 係第一二次較多野睇同多野賣. 最近一兩次真係差左好多, 價錢又唔係太平. 行左一陣, 等埋個抽奬就閃. 我張飛係5021, 抽到朝早section大奬個位係5025!!!!!!!!!!!! 早知遲少少入 :p 諗住咁早出下旺角買野. 好好彩俾我係先達見到wii 盒decasporta. 好多鋪頭都賣晒..... 好開心, 終於買到. 跟住行左去油麻地踏地鐵返屋企. 返到屋企玩陣wii fit 同盒新game. 玩左羽毛球, 沙灘排球, 射箭同花式溜冰. 都幾得意. 雖然個羽毛球幾好玩, 但都係鍾意打真既毛毛波, 好玩好多.

到禮拜一啦, 有D失落, 因為聽日要開工啦. 今日真係休息日. 本來想去游下水, 但諗下都係係屋企抖下, 因為呢輪真係好攰. 今日做既野唔多, 係屋企讀下日文, 玩下WII, NDS, 訓下晏晝覺 (好耐冇試過咁悠閒 :P), 聽下歌仔, 好快咁就一日. 今日終於見到藍天, 所以係將中食完晏都係出面行左一陣, 真係舒服到呢............... 夜晚突然心血來潮, 決定煮飯仔, 順便煮埋聽日晏晝個餐. 食完飯抺乾淨個廚房. 覺得好滿足. 都有諗過不如落去會所游下水, 但結果同朝早一樣.

咁就過完一連四日既假期. 要諗下下次幾時放假. 舊年仲有十八日半未放. 要今年九月尾放晒. 今年返唔返澳洲真係要取決於D澳幣點樣. 而家高到咁得人驚. 唔想晒錢. 寧願係香港好過. 如果唔放. 真係可以提早放我既例五假期.